Qeveria ka dërguar në Kuvend projektligjin për “Buxhetin e Shtetit” të vitit të ardhshëm duke parashikuar të shpenzojë rreth 637 miliardë lekë kundrejt 536miliardë lekë të ardhura. Në këtë mënyrë, qeveria planifikon të ketë një deficit buxhetor prej rreth 101 miliardë lekësh, të cilat do t’i mbulojë duke marrë borxh brenda dhe jashtë vendit.
Në lidhje me rritjen e pagave për vitin 2022, qeveria planifikon që të ketë një shtesë mesatare prej 6 për qind për mësuesit dhe personelin shëndetësor, ndërsa shpenzimet për administratën publike janë planifikuar të shkojnë 90.6 miliardë lekë.
“Shpenzimet e personelit për vitin 2022, reflektojnë koston aktuale të Administratës Publike, si dhe politikën e re të rritjes së pagave kryesisht për sektorët e shëndetësisë, arsimit dhe mbrojtjes. Fondi vjetor për rritjen e pagave është planifikuar në shumën 2.4 miliardë lekë dhe parashikon rritjen e pagës për funksion me 6% për punonjësit shëndetësor dhe ata arsimorë. Shpenzimet totale për pagat në Administratën Publike janë planifikuar në masën 90.6 miliardë lekë ose 4.9% e PBB-së”, parashikohet në buxhet.
Ndonëse më herët u tha nga ministrja e Financave se në buxhetin e vitit 2022 nuk parashikohej një rritje pensionesh, qeveria duket se ka ndërruar mendje, pasi planifikohet një rritje minimale duke marrë në konsideratë vetëm indeksimin e tyre në treguesit e inflacionit.
Qeveria ka parashikuar në buxhet një fond prej 2.6 miliardë lekësh për indeksimin e pensioneve, ndërsa ka akorduar gjithashtu një fond tjetër prej 3.5 miliardë lekësh me qëllim dhënien e një bonusi ndaj pensionistëve për festat e fund vitit.
Në lidhje me bonusin e bebeve janë parashikuar 2.2 miliardë lekë, kurse për të përndjekurit është parashikuar një fond prej 1 miliardë lekësh.
