Qeveria e Kosovës ka vendosur dhe nënshkruar reciprocitetin ndaj Serbisë sa u takon targave të automjeteve, vendim që do të hyjë në fuqi ditën e sotme.
Mediat kosovare, njoftojnë se sipas vendimit, të gjitha automjetet që mbajnë targa të Serbisë dhe hyjnë në Kosovë duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
Targat duhet të vendosen në vende të dukshme dhe për vendosjen e tyre do të ketë një pagesë prej 5 eurosh, ndërsa shkruhet gjithashtu se vlefshmëria e targave zgjat 60 ditë.
Ndër të tjera, palët do të pajisen me vërtetim si zëvendësim i certifikatës së regjistrimit të automjetit.
Pas vendimit për reciprocitetin e targave të makinave që vijnë nga Serbia, njësia Speciale e Kosovës është dërguar në pikën kufitare në Jarinjë për t’u vendosur makinave targat e përkohshme. Dhjetëra autoblinda të Policisë së Kosovës janë pozicionuar në vendin ku më parë ka qenë pika kufitare.
Me marrëveshjen e Brukselit për lëvizjen e lirë, e cila u arrit në korrik të vitin 2011 në dialogun teknik ndërmjet Kosovës dhe Serbisë, ishte përcaktuar që të gjithë pronarët e makinave që banojnë në Kosovë, duhet të përdorin targat “KS” (Kosovë) ose “RKS” (Republika e Kosovës) dhe kështu t’i hiqnin nga përdorimi targat që për serbët e Kosovës i lëshonte Ministria e Punëve të Brendshme e Serbisë.
Sipas marrëveshjes, në Serbi mund të futen nga Kosova të gjitha veturat me targa KS, kurse ato me RKS duhet t’i ndërrojnë ato në kufi, duke marrë një letër të përkohshme që jep pala serbe. Në anën tjetër, veturat me targa të Serbisë futen lirshëm pa procedura shtesë në Kosovë.
Por vendimi i sotëm i qeverisë së Kosovës vendos reciprocitetin e targave, kështu dhe makinat me targa serbe qe hyjnë në Kosovë, duhet të pajisen me targa të përkohshme kosovare. D.L/ Gijotina.com
