Qeveria është “zgjuar”, vijon prishjen e ndërtimeve që si kishte parë

Edhe gjatë muajit nëntor po vijon puna për lirimin e hapësirave publike nga ndërtimet e paligjshme.

Ky operacion i paraprin zbatimit të programit “Rilindja Urbane 2.0”, i cili synon të kthejë ligjshmërinë në territor, duke sjellë zhvillim për komunitetet.

Kryeministri Edi Rama ndau sot në rrjetet sociale pamje nga puna për shembjen e ndërtimeve pa leje, të cilat kishin zënë hapësirat në shumë lagje të qyteteve, por edhe të lavazheve buzë rrugëve kombëtare.

Qeveria shqiptare ka ashpërsuar masat për forcimin e kontrollit mbi territorin, mbrojtjen e hapësirave publike, zbatimin cilësor të lejeve të ndërtimit dhe ndëshkimin e ndërtuesve që i shkelin ato.

Në zbatim të programit “Rilindja Urbane 2.0”, qeveria ka ndërmarrë që prej muajit korrik operacionin për lirimin e hapësirave publike nga ndërtimet e paligjshme në të gjithë vendin.

Një punë e mirë vijon të bëhet edhe për heqjen e inerteve, që shkaktohen nga shembja e tyre, duke i kthyer hapësirat në funksion të qytetarëve.

Në dispozicion të qytetarëve të cilët duan të denoncojnë rastet abuzive është vënë në dispozicion portali “Hapësiraimepublike.gov.al”.

Deri sot në këtë portal janë raportuar 15 172 raste, nga të cilat janë zgjidhur 11 577 raste, ndërsa 3 595 të tjera janë aktualisht në proces shqyrtimi.