Qeveria franceze do të përballet të hënën me dy vota besimi në përgjigje të vendimit të presidentit Emmanuel Macron për të anashkaluar parlamentin dhe realizuar reformën e tij të kundërshtuar në popull, të pensioneve, e cila do të rrisë moshën e daljes në pension nga 62 në 64 vjeç.
Nëse votat e mosbesimit fitojnë shumicën e vendeve, projektligji i pensioneve do të anulohet dhe kryeministrja Elisabeth Borne do të duhet të japë dorëheqjen, duke e detyruar presidentin Macron të krijojë një qeveri të re ose të thërrasë zgjedhje të parakohshme.
Grevat e transportit vazhdojnë edhe sot, ndërsa sindikatat kanë propozuar ditën e nëntë të grevës për të enjten më 23 mars.
Kjo është sfida më e madhe me të cilën përballet qeveria e Presidentit Macron që nga protestat e jelek verdhëve që filluan në 2018.
Çfarë është neni 49.3?
Të enjten, pak përpara votimit të planifikuar për projektligjin e qeverisë për reformën e pensioneve në Dhomën e Ulët të parlamentit të Francës, Macron vendosi të përdorë nenin 49.3, një fuqi e veçantë e parashikuar në kushtetutë që i lejon qeverisë të miratojë një projekt-ligj pa votim në Asamblenë Kombëtare.
Si kundërpërgjigje, ligjvënësit mund të paraqesin një mocion mosbesimi brenda 24 orëve, gjë që nëse miratohet nga më shumë se gjysma e deputetëve, do të thotë se projektligji bie dhe qeveria duhet të japë dorëheqjen.
Duke pasur parasysh mungesën e mbështetjes publike dhe politike për projektligjin, siç u dëshmua në javët e protestave dhe grevave që kanë parë grumbullimin e plehrave në Paris, qeveria franceze e përdori nenin pasi nuk kishte garanci se do të fitonte shumicën në Asamblenë Kombëtare.
Fuqia speciale është përdorur më parë dhjetë here, edhe nga kryeministrja aktuale Elisabeth Borne për të miratuar faturat e buxhetit.
Discussion about this post