Qeveria shqiptare po bën pagesa jashtë kontrate për incenratorët, të cilat shkaktojnë miliona euro dëme në buxhetin e shtetit. Në dy vitet e fundit evidentohet se qeveria ka firmosur kontratat fiktive për inceneratiorin e Elbasanit dhe atë të Fierit, duke lënë kështu hapësira për shtesë fondi pa kriter dhe që nuk raportohen.
Kjo është evidentuar në raportin vjetor të Drejtorisë së Inspektimit Financiar, ku rezulton se në kontratën fillestare, Ministria e Mjedisit nuk ka treguar vlerat e kësteve që duhen paguar për të gjitha pikat e projektit, duke treguar kështu një vlerë shumë të ulët fondi nga sa është dhënë në të vërtetë për këto koncesione.
Gjithashtu raporti, vlerëson si problematikë faktin që kontratat janë nënshkruar me një fond limit në euro dhe jo në lekë, çka do të thotë se pagesa e kësteve në vazhdim rritet në bazë të tregut valutor. Për të manipuluar të dhënat reale, Ministria e ka firmosur këtë kontratë, duke anashkaluar rregullat e plota ligjore.
“Ministria e Mjedisit, në cilësinë e Autoritetit Kontraktues, ka lidhur kontratën e Koncesionit të formës “BOT” për Ndërtimin dhe Administrimin e Impiantit të Përpunimit të Mbetjeve Urbane të Qarkut të Elbasanit me shoqërinë “Albtek Energy” sh.p.k, me Nipt L41914013H, në cilësinë “Koncesionari”. Kjo draft-Kontratë nuk ka marrë formën e një akti juridik, pra nuk është kthyer në kontratë përfundimtare. Draft-Kontrata për Inceneratorin e Elbasanit, është nënshkruar me vlerën financiare të shprehur në valutë/ në monedhën Euro dhe jo në lekë, duke sjellë ekspozim në këtë mënyrë, të risqeve nga kursi i këmbimit. Mungon Aneksi X, që përcakton “Koston totale të investimeve”, si pjesë e kontratës. Nuk dokumentohet që Aneksi B të jetë nënshkruar nga palët kontraktore”, thuhet në raport.
Nga auditimi i kryer rezulton se qëllimisht kontratat nuk kanë marrë formën përfundimtare, sepse kështu shumë lehtësisht ministria përgjegjëse ka mundur të shtyjë afatin e punimeve për “Albtek Energy”, pa as edhe një kosto shtesë, që sipas rregullit do detyrohej të paguante koncesionari.
“Është bërë shtyrje e afatit të punimeve të kontratës për një periudhë 6-mujore (30.06-30.12.2016), por nga palët kontraktore nuk është realizuar mbulimi me sigurim të kontratës për gjithë periudhën e ndërtimit të veprës dhe vënia në punë e impiantit”, përcakton raporti.
Në përfundim, raporti sqaron se duke mos përcaktuar disa aneskse në kontratë, vlera reale për anekset në total është shumë më e lartë. Pra 4684 mijë euro më shumë nga sa raportohet në këtë kontratë fiktive. Kështu dëmi total i shkaktuar ndaj buxhetit të shtetit vetëm për incenratorin e Elbasanit kap vlerat e mbi 21 milionë eurove.
“Në Draft Kontratën e nënshkruar është përcaktuar shuma 21,600,000 Euro, në përcaktimin “Kosto e parashikuar e Investimit”, kurse në Aneksin B të kontratës është përcaktuar vlera në shumën prej 21.661.000 Euro. Në ofertën ekonomike të paraqitur nga subjekti “Albtek Energy”, vlera totale e investimit paraqitet në vlerën 21,600,000 Euro.
Pra, nga përllogaritjet e kryera mbi vlerat e detajuara dhe vlerën totale të Aneksit B, këstet mujore paraqiten në vlerën e këstit 328.126 Euro për 66 periudha mujore dhe rezultojnë në shumën totale 21.656.316 Euro, pra janë paraqitur me një diferencë –4684 euro më pak së vlera totale e vërtetë e të kësteve në Aneksit B, prej 21.661.000 euro”, thuhet në raport.
Aferat me inceneratorin e Fierit
Për koncesionarin me inceneratorin e Fierit evidentohet se qeveria jonë ka pasur aq shumë fonde sa i ka dhënë kompanisë “Integrated Technology Waste Treatment Fier Sh.p.k” pagesa para afatit të caktuar në kontratë. Për më tepër këto pagesa paradhënie janë bërë pa TVSH dhe kjo e rrit vlerën e shumës së vjedhur. Sipas të dhënave, dëmi i shkaktuar nga kjo shkelje kap vlerën e më shumë se 94 milionë eurove.
“Nga ana e Drejtorisë së Financës/Ministria e Mjedisit dhe Drejtoria e Menaxhimit Financiar dhe Buxhetit/MIE, është paguar paradhënie TVSH-ja, për periudhën Prill 2017 -Dhjetor 2017, për 9 këste mujore/periudha, në vlerën 94, 096. 278 lekë, pagesë kjo në kundërshtim me grafikun/skedulin e kësteve për likuidimet sipas Aneksit V të kontratës koncesionare, si dhe në kundërshtim me kërkesat e Ligjit nr.92/2014 “Për Tatimin mbi vlerën e shtuar”, thuhet në raport.
Të gjitha këto shuma marramendëse janë para që vilen nga taksapaguesit shqiptar, për të cilët barra bëhet gjithmonë edhe më e rëndë.
E. H/ gijotina.com/
