Qeveria gënjen kur thotë se ritmi i vaksinimit po ecën në ritme të larta, pasi të dhënat reale tregojnë që jemi një nga vendet me më pak të vaksinuar në rajon. Përmes një raporti të publikuar, “Open Data” tregon se që nga dita kur ka filluar vaksinimi në vend dhe deri në 20 shtator në Shqipëri janë vaksinuar me dy doza të plota vetëm 25% e popullsisë, ndërsa 32% vetëm me një dozë, por sikur tregojnë studimet shkencore marrja e një doze vaksine nuk jep efekt përballë virusit.
Vërehet se ne jemi dhe më dobët se Maqedonia e Veriut,e cila ka vaksinuar me dy dozat 29% të popullsisë, madje dhe më ke se Serbia dhe Mali i Zi të cilet kanë vaksinuar përkatësisht 45% dhe 32% të popullsisë me të dy dozat e vaksinës.
“Vendet e Ballkanit Perëndimor rezultojnë me ritëm më të ngadaltë vaksinimi, ku më pak se gjysma e popullsisë është vaksinuar të paktën me një dozë apo dozat e plota. Në pozitën më të mirë qëndron Serbia qe ka vaksinuar të paktën 40% të popullsisë, ndërsa në pozitën më pak të mirë rezulton Bosnjë Hercegovinë me 13% të popullsisë vaksinuar plotësisht. Ndërsa Shqipëria ka vaksinuar 25% të popullsisë më doza të plota apo 32% me të paktën një dozë”, thuhet në raport.
Shteti që ka progresuar më shpejt në vaksinimin e popullsisë kundër Covid- 19, rezulton Islanda, ku 90.5% e popullsisë ka kryer vaksinimin e plotë. Po kështu dhe Irlanda ndodhet në një pozitë të afërt, ku 90% e popullsisë ka marrë vaksinimin e plotë. Ndiqen nga shtete si: Malta, Danimarka, Portugalia, Belgjikë, Norvegji, Spanjë dhe Francë, ku secila ka vaksinuar plotësisht mbi 80% të popullsisë. Veçojmë Portugalinë e cila ka vaksinuar pjesë më të madhe me të paktën 1 dozë, rreth 97% të popullsisë.
Shtete që rezultojnë me progres jo shumë të lartë në vaksinim janë: Bullgaria me vetëm 21.7%, Rumania me 32.8%, Latvia me 48.1% dhe Kroacia me 48.9% të popullsisë, që janë vaksinuar plotësisht.
E,H/ gijotina.com/
