Ministria e Infrastrukturës dhe Energjisë ka shtyrë afatin e dorëzimit të ofertave për garën e partneritetit publik-privat për ndërtimin e aeroportit të Sarandës. Me shpalljen e garës, afati përfundimtar ishte data 23 shtator, por sipas të dhënave nga Agjencia e Prokurimit Publik, tashmë ai është shtyrë për në datën 4 tetor. Kontrata për ndërtimin e këtij aeroporti do të ketë një kohëzgjatje 35-vjeçare, ndërkohë që vlera e parashikuar e investimit është 34.32 mln euro.
Pesë muaj pas zgjedhjeve parlamentare të 25 prillit, qeveria po hedh poshtë një nga premtimet më propagandistike të fushatës. “Pika më e fortë” e programit qeverisës të PS për fushatën ishte ndërtimi i porteve, aeroporteve dhe hekurudhave, ku kryeministri Rama thoshte se “Ne do t’i hapim portat Shqipërisë, në qiell dhe në det”, teksa fliste për ndërtimin e 3 aeroporteve të reja si Kukësi, Vlora e Saranda si dhe ndërtimi i 4 porteve të mëdha, siç është ai i Durrësit, i Vlorës, i Sarandës dhe Shëngjinit.
Por sikundër ndodh rëndom me premtimet e fushatës në Shqipëri, edhe qeveria Rama vetëm pesë muaj pas zgjedhjeve vendosi të shtyjë ndërtimin e aeroportit të Sarandës, për një moment të dytë që ndoshta mund të mos vijë kurrë, ose në rastin më të mirë mund t’i shtohet axhendës së kryeministrit për mandatin e katërt.
Mësohet se, ky investim do të kryhet nga kompania që do të shpallet fituese në garë, ndërkohë që pas projektimit, ndërtimit, operimit dhe mirëmbajtjes, në përfundim të periudhës 35-vjeçare do të bëhet transferimi i veprës aeroportule pranë organeve shtetërore. Ndërkaq, në kërkesat specifike, theksohet se koncesionari do të sigurojë që Terminali, pas fillimit të operacioneve dhe para fillimit të zgjerimit të tij, duhet te akomodoje jo me pak se 130 000 pasagjerë në vit. Ndërkohë që, pas vitit të pestë të operimit, pritet që numri i pasagjerëve të rritet në 300 mijë në vit, ndërsa pas 10 vitesh, në 700 mijë në vit.
Paralelisht, Ministria e Infrastrukturës dhe Energjisë ka zbardhur edhe draft-kontratën që do të nënshkruhet me kompaninë fituese, sipas së cilës shteti shqiptar do të përfitojë 2% të të ardhurave vjetore bruto të aeroportit të Sarandës, në formën e një tarife koncesionare. Më herët autoritetet kanë deklaruar se aeroporti i Sarandës do të ketë kryesisht profilin e një aeroporti turistik, që funksionon zakonisht 7-8 muaj në vit, por ai mund të shërbejë edhe përtej sezonit për fluturime të brendshme.
Kryeministri Rama i nisi premtimet për zgjedhjet e 25 prillit që në muajin shkurt, ende pa nisur zyrtarisht fushata elektorale, duke mos i lënë asgjë në dorë fatit dhe që bashkë me faktorë të tjerë të jashtëm i siguruan mandatin e tretë në pushtet.
