Italia do të ofrojë 10 mijë viza pune shtesë për emigrantët vitin e ardhshëm, për gjithë ata që do të kujdesen për të moshuarit dhe personat me aftësi të kufizuara, njoftoi qeveria të mërkurën, pasi miratoi një paketë të re rregullash migracioni.
E mbushur me një popullsi në plakje dhe një nivel të ulët lindjesh, Italia është përballur prej kohësh me mungesën e kujdestarëve dhe organizatat bamirëse duke përfshirë grupin katolik Sant’Egidio kanë lobuar te qeveria që të lejojë më shumë prej tyre të vijnë nga jashtë.
Kuota shtesë “eksperimentale” për kujdestarët do t’i shtohet numrit 452 mijë vizave të punës të shpallura për periudhën 2023-2025 vitin e kaluar, e cila përfaqësonte një rritje prej afro 150% nga tre vitet e mëparshme.
Qeveria e djathtë e kryeministres Giorgia Meloni ka miratuar një sërë masash për të frenuar ardhjet e paligjshme, por edhe ka zgjeruar kanalet e ligjshme të emigracionit në përgjigje të mungesës në rritje të fuqisë punëtore.
Dekreti i ri prezanton gjithashtu masa mbrojtëse më të rrepta kundër mashtrimit në sistemin e vizave të emigrantëve, pasi Meloni denoncoi se ai ishte infiltruar dhe shfrytëzuar me mashtrim nga grupet e krimit, përfshirë mafien.
Në deklaratën e qeverisë thuhet, ndër të tjera, se kontrolle më të ashpra do të zbatohen në vitin 2025 për aplikimet nga vendet që konsiderohen të jenë në rrezik më të lartë mashtrimi, përkatësisht Bangladeshi, Pakistani dhe Sri Lanka.
Discussion about this post