“Qeveria kompenson kompanitë e rindërtimit me 80 mln euro”, Tabaku: Kush mendon për qytetarët?

Gjatë fjalës së saj në Kuvend, deputetja e Partisë Demokratike, Jorida Tabaku ka deklaruar se qeveria me një akt normativ ka vendosur të kompensojë kompanitë e rindërtimit me 80 milion euro. Tabaku tha se teksa po rriten çmimet e ushqimeve të shportës, qeveria ka vendosur që të rishpërndajë të ardhurat shtesë në buxhet. Ajo gjithashtu ka theksuar se sot më shumë se kurrë qytetarët kanë nevojë të ngrenë zërin.

“Janë rritur prodhimet e shportës. Çfarë bën qeveria. Ajo bën një akt normativ ku vendos të kompensojë kompanitë e rindërtimit me 80 mln euro. Qeveria rrit me 80 mln euro bizneset e familjarëve dhe miqve. Sot çmimet në treg i përjetojnë të gjithë qytetarët, bizneset. Qeveria vendos të rishpërndajë të ardhurat shtesë në buxhet. Kush mendon për qytetarët. Kush diskuton se çfarë përfitimi duhet të kenë qytetarët. Këto i interesojnë qytetarëve. Duhet të ketë guxim për të folur për kompanitë e karburanteve. Duhet të kesh guxim. Besoj që sot qytetarët kanë nevojë, që kushdo të ngre zërin dhe të tregojë guxim sepse për këtë jemi votuar” – tha Tabaku.