Fermer nga Lushnja, Fieri dhe Berati kanë dalë sot në protestë në Urën e Kuçit. Me pankarta në duar ata shprehen se qeveria i gënjeu për subvencionin e naftës, pasi ata po paguajnë çdo litër shumë më shtrenjtë. Një prej tyre tha se jo vetëm për naftën, por qeveria nuk po i subvencionon asgjë, madje iu ka rritur çmimet e plehrave kimik. Sipas tij, këtë vit bujqësia mori goditjen e fundit
“Ne kërkojmë të gjitha të drejtat tona. Këtë vit, nafta 2 mijë lekë. Plehrat kanë vajtur 110 mijë lekë. Për ne ka mbetur vetëm të ikim fare që prej këtu. Jemi të mbaruar fare. Ky vit është viti që i jep fund bujqësisë. Llogarite, ka vajtur gjys për gjys, tashmë vetëm në fund do shkojë, do mbarojë”, tha ai.
Një tjetër banorë tha se kanë të pamundur të shtojnë prodhimet për shkak të kostove të larta që kërkon kultivimi. Ai tha se kishin bërë një marrëveshje me Ministrinë e Financave që do të lehtësonte barrën për fermerët dhe do të rishikonte në rritje buxhetin për ta, por kjo marrëveshje nuk u vu në zbatim.
“Ju e keni vënë re në media se fermerët herë pas here kanë ngritur problemet e tyre. Sot jemi në kushtet e një krize që kush ka një serë një traktor e ka të pamundur të shtojnë prodhimet e tyre. Duke marrë në konsideratë çmimet e larta është e pamundur të ushtrohet veprimtaria e fermerëve. Ne prisnim një buxhet me lehtësime për fermerët. Ne kishim një marrëveshje me ministrinë e Financave dhe të Bujqësisë por kjo nuk është respektuar. Ne kërkojmë rishikim të buxhetit të bujqësisë dhe rishikim i skenës së rimbursimit”, tha një tjetër banor.
Më shumë ka qenë një e papritur sa i përket blegtorisë, sepse ishte premtuar se do mbështeteshin me lekë për litër fermerët që kishin 5 krerë e sipër. Por mesa duket ky ka qenë vetëm një premtim i momentit për të zbutur situatën
Discussion about this post