Qeveria ka ndryshuar mendje dhe është tërhequr nga koncesioni për kolaudimin, pasi ka vendosur që ky shërbim të ofrohet nga shtetit. Lajmin e ka bërë të ditur sot në komisionin e Ekonomisë nga Ministrja e Financave, Delina Ibrahimaj. Ajo tha se ky koncesion parashikohej si një kontrate shtesë për 2022, por që është vendosur të anulohet.
“Në listën totale shtesë të koncesioneve të cilat mund të zhvillohen, kemi hequr koncesionin e kolaudimit, i cili është një shërbim që kryhet nga DPSHTRR, dhe ishte i mbetur aty prej vitesh”, u shpreh Ibrahimaj. Kujtojmë se, ky koncesion në vlerën e 20.295 miliardë lekëve, që ishte i listuar mes 7 kontratave të mundshme për të nisur në vitin që vjen është hequr nga lista për shkak se shërbimi ofrohet nga DPSHTRR.
Ndër të tjera ajo tregoi se janë rishikuar edhe koncesionet e tjera të kësaj liste ai i segmentit rrugor Milot-Fier në vlerën e 178,2 miliardë lekë dhe ai i triportit Vlorë me vlerë 5.612 miliardë lekë. Ndërkohë në listën e investimeve është saktësuar edhe vlera totale që do të ketë rruga e Arbrit, për të cilën herë pas here janë dhënë shifra të ndryshime.
“Kemi saktësuar shifrën e rrugës së Arbrit, e cila në tabelën e mëparshme kishte një vlerë deri në fund të projektit. Është saktësuar vlera e rrugës që është 40.3 miliardë lekë me TVSH”, u shpreh ministrja e Financave. Për vitin e ardhshëm vlera e pagesave për koncesionet aktive, do të jetë 13.8 miliardë lekë, nga 12.4 miliardë lekë që është vlera e parashikuar për këtë vit.
Discussion about this post