Situata e krijuar brenda Partisë Demokratike dhe frika e institucioneve për protesta në të ardhmen nga ana e opozitëa ka shtyrë qeverinë të miratojë një vendim që i jep të drejtë Gardës së Republikës të përdorë në të ardhmen lëndë paralizuese kimike dhe pajisje të tjera kundër turmave.
Sipas një VKM-je parashikohet që Garda të pajiset me armatim të ri, duke përfshirë këtu edhe lëndë kimike neuroparalizuese.
Po ashtu, ligji i datës 1.12.2003, për pajisjen e punonjësve të Gardës së Republikës së Shqipërisë me armatim dhe mjete teknike të posaçme shfuqizohet duke i lënë vend vendimit të ri.
Kjo lëvizje vjen në një kohë kur situata brenda kampit opozitar është e tensionuar dhe ish kryeministri Berisha, i njohur për protesta, ku nuk kanë munguar edhe sulmet ndaj institucioneve, ka nisur lëvizje kundër kryedemokratit Lulzim Basha. Kjo lëvizje ka çuar në një konflikt mes dy figurave të PD dhe nuk përjashtohen përplasje të ashpra. Por nga ana tjetër, opozita ka paralajmëruar se lufta ndaj qeverisë do të jetë frontale gjatë mandatit të tretë të saj.
Deri më sot, mjete të tilla janë përdorur vetëm nga forcat speciale të policisë, të cilat në shumë raste janë kritikuar për përdorimin e tyre. Tashmë, Gardës i vihen në dispozicion mjete shtesë, të cilat mund të përdoren prej tyre me pelqimin e qeverisë.
