Pavarësisht se dy javë më parë gjuetarët paralajmëruan protesta, Ministria e Turizmit vazhdon me planin e saj për shtyrjen me 5 vjet të moratoriumit të gjuetisë. Ditën e sotme, ministria ka hedhur për konsultim projektligjin, i cili kërkon shtyrjen e afatit dhe përcakton vlerën e gjobës për ata që shkelin rregullat.
“Projektligji “Për shpalljen e moratoriumit të gjuetisë në Republikën e Shqipërisë” ka si qëllim që të ndalojë ushtrimin e aktivitetit të gjuetisë me synim vijimin e përmirësimit të gjendjes së llojeve të faunës së egër, objekt gjuetie Objektivi kryesor që synohet të arrihet me këtë akt lidhet me krijimin e qetësisë dhe kushteve të favorshme për rimëkëmbjen e llojeve të faunës së egër objekt gjuetie, por dhe të llojeve të tjera të cilat nuk janë objekt gjuetie dhe që ndikohen nga gjuetia e paligjshme”, thuhet në relacion.
Sakaq, evidentohet se, në ato raste kur rregullat e vendosura shkelen nga operatorët e tureve të gjuetisë, shoqatat e gjuetarëve ose federatat e gjuetarëve, subjekti që e organizon dënohet me gjobë në masën 800 000 – 1 000 000 (një milion) lekë. Ndërsa, kur shkelja kryhet nga një person ose personi është pjesëtar i subjekteve organizuese, dënohet me gjobë në masën 80 000 (tetëdhjetë mijë) – 100. 000 lekë.
Discussion about this post