Ambasada e Austrisë në Shkup ka reaguar në lidhje me rastin ku një qytetare është ankuar për shkak se asaj nuk i është pranuar viza.
Merita Hoxha-Maksuti nga Kosova, pak ditë më parë kishte reaguar në rrjetet sociale për shkak se nuk i ishte aprovuar viza. Ajo shkruante se i kishte plotësuar të gjitha dokumentet e nevojshme, por sërish nuk ishte përzgjedhur. Merita është nëna e një vajze të vogël e cila për arsye shëndetësore ndodhet për shërim në Austri. Qëllimi i vizitës së kërkuar prej saj është për të takuar vajzën e vogël e cila kërkon të ëmën.
Pas reagimeve të shumta qytetare ndaj vendimit të ambasadës austriake, kjo e fundit ka dalë me një sqarim. Në faqen e saj zyrtare në “Facebook”, thuhet se Ambasada Austriake shqyrton çdo aplikim për vizë sipas rregulloreve e ligjeve të shtetit.
“Ambasada duhet të kontrollojë informacionin nga aplikacioni për plotësinë dhe korrektësinë. Nëse dokumentet mungojnë ose nëse informacioni thelbësor rezulton i pavërtetë, përgjegjësia për këtë nuk është e ambasadës”, shkruhet në njoftim.
Në lidhje me rastin në fjalë, për Meritën e cila kërkon të bashkohet me vajzë ne vogël në Austri, ambasada pohon se nuk ka të drejtë të komentojë për rastet individuale.
“Në raste urgjente humanitare kërkesave për viza u jepet përparësi”, teksa pohon se rasti i Meritës nuk është cilësuar i tillë.
“Në përgjithësi, procedurat e vizave kërkojnë vetëm një vizitë të vetme”. “Shpesh ambasada lëshon atë që njihet si “njoftim mandati”, thuhet në status.
Në këtë reagim, nuk i është dhënë zgjidhje kësaj çështje teksa ambasada bën thirrje se të gjithë aplikantët që kanë kundërshtime të vendimit, duhet të paraqesin dokumente shtesë. Në këtë mënyrë ato do të merren parasysh për vendimin përfundimtar.
