Rritja e çmimeve ka detyruar sërish qytetarët e Shkodrës të dalin në protestë në përpjekje për të “luftuar” këtë problematikë. Paditen e kësaj të marte ata janë mbledhur në sheshin e qytetit dhe kanë kërkuar që zëri i tyre të dëgjohet pasi ky problem prek të gjitha familjet shqiptare.
“Jam bashkë me shoqërinë civile po protestojmë më së shumti për rritjen e çmimeve të produkteve të shportës. Shpresoj që zëri jonë dhe pse jemi pak persona të dëgjohet dhe të merret parasysh qëndrimi ynë”- tha një nga protestuesit për mediat.
“Program shumë i mirë ai Adriatik Llapajt, njerëzit duhet të reagojnë, Rama ka frikë vetëm njerëzit dhe duhet të ngriheni sepse thika ka shkuar deri në palcë. Ky pushtet nuk kujdeset për qytetarët e vet dhe i lë në varfëri. Në këtë zonë ndodhen mbi 10 mijë banorë, ndërkohë rruga nuk njeh ndërhyrje prej shumë vitesh,”-u shpreh një tjetër.
Kujtojmë se një ditë më parë, për më shumë se një orë qytetarët janë mbledhur para Kryeministrisë për të protestuar lidhur me rritjen e çmimeve. Ata kërkojnë heqjen e TVSH-së për ushqimet e shportës, uljen e TVSH-së në masën 10% të çmimit të energjisë për bizneset e vogla dhe familjet, heqjen e taksës së qarkullimit në naftë si dhe heqjen e akcizës së gazit.
