Ndërsa vendi po zien nga protestat, kryeministri i Sri Lankës, Ranil Wickremesinghe, është betuar si president i përkohshëm. Ai zëvendëson Gotabaya Rajapaksa i cili u largua në Singapor pas protestave masive, ku demonstruesit pushtuan pallatin presidencial.
Sri Lanka po përjeton kaos ekonomik pasi përballet me mungesë të ushqimit, karburantit dhe furnizimeve të tjera bazë.
Procesi i zgjedhjes së një presidenti të ri nga parlamenti do të fillojë të shtunën. Duke qenë se partia qeverisëse ka shumicën, deputetët mendohet se do të mbështesin Wickremesinghe, i cili ka lidhje të ngushta me familjen Rajapaksa.
Ndërkohë dorëheqja e Wickremesinghe si kryeministër është një kërkesë kryesore e protestuesve.
Gjatë kësaj jave, turmat hynë në kompleksin e ish-kryeministrit, duke u përleshur me forcat e sigurisë.
“Ai nuk ka mandatin e njerëzve dhe është një mbështetës i Rajapaksa,” tha një protestuese për BBC. “Dua të them se presidenti i ri dhe kryeministri i ri nuk duhet të jenë një mbështetës i Rajapaksës.”
Guvernatori i bankës qendrore të Sri Lankës, Nandalal Weerasinghe, ka paralajmëruar se vendi mund të kthehet në kolaps nëse së shpejti nuk formohet një qeveri e qëndrueshme.
Discussion about this post