Pas protestës në ditën e mërkurë për rritjen e çmimit të energjisë dhe bukës, qytetarët kanë vendosur të kthehen sërish sot para Kryeministrisë. Në fakt ata e paralajmëruan protestën e sotshme që herën e parë, duke i lënë qeverisë disa pika, mbi të cilat duhet të reflektojë dhe t’iu kthejë përgjigje sot.
Sipas thirrjes së tyre publike, protestuesit do të mblidhen në orën 17:00 në Bulevardin ‘Dëshmorët e Kombit’, ku ishin 5 ditë më parë. Nismëtari i protestës ka qenë Avokati Adriatik Llapaj, i cili mbrëmjen e djeshme, me anë të një statusi në “Facebook” ka paralajmëruar protestën e radhës për rritjet e çmimeve.
Ai bën të ditur se qeveria ka plotësuar një ndër kërkesat e tyre, atë të mos rritjes së çmimit të energjisë mirëpo sipas tij nuk është e plotë. Lapaj dhe qytetarët kërkojnë masa dhe për energjinë, biznesin e mesëm dhe të madh, si dhe ndërhyrje në TVSH me taks qarkullimi të përkohshme deri në momentin e stabilizimit të çmimeve në bursë.
“Nesër në orën 17.00 do të jem përballë Kryeministrisë. Nisi me 4 kërkesa. Qeveria u tërhoq nga rritja e çmimit të energjisë për konsumatorët familjarë dhe biznesin e vogël. Një arritje e qytetarëve, por jo e plotë .Duhen masa dhe për energjinë për biznesin e mesëm dhe të madh pasi produktet e tyre do të reflektojnë rritje çmimi. Duhet zgjidhje për çmimin e ushqimeve të shportës dhe karburantit dhe konkretisht me ndërhyrje në TVSH dhe taks qarkullimi qoftë dhe përkohësisht sa të stabilizohen çmimet në bursë.
Italia, Greqia dhe mbarë vendet afër nesh TVSH-në e ushqimeve të shportës e kanë nga 4 deri në 13%, ne e kemi 20%.Unë e di që këtu e liga i vë bisht dhe bishtit. Jam i gatshëm edhe për baltëhedhjen. Papritur shumë do më nxijnë. Kjo është kosto e të përballurit. Gjithsesi unë jam dhe do jem sa të kem frymë i PASHANTAZHUESHËM. Bujrum në betejë! Nesër në 17.00 para Kryeministrisë qoftë dhe TEK PULLË. Ndoshta aty do jemi mijëra TEK PULLË”, shkruan ai.
Ndërsa i kujton qeverisë se i ka mbaruar afati për të menduar rreth kërkesave të tyre të cilat janë; heqja e TVSH për ushqimet e shportës. Ulja e TVSH-së në masën 10% të çmimit të energjisë për bizneset e vogla dhe familjet. Heqja e taksës së qarkullimit në naftë dhe heqja e akcizës së gazit.
