Zv/kryeministri Arben Ahmetaj e cilëson të lirë makinën e tij me vlerë 28 mijë euro, në një situatë kur vendi po kalon një krizë totale. Çmimet janë duke u ngritur, por kjo gjë duket se nuk i ka frenuar politikanët e “Rilindjes”, të cilët vijojnë të bëjnë blerje marramendëse. Pas darkës tek Nusreti, Ahmetaj ka menduar dhe për një makinë komode, e cila është një “Hyundai Genesis”, ndër prodhimet luksoze e të shtrenjta të kompanisë në fjalë. Pak orë më parë, deputeti i PD, Edi Paloka reagoi në lidhje me vlerën e madhe të kësaj makine, teksa ky i fundit është mbrojtur duke konfirmuar një vlerë më të ulët nga ajo e demokratit. Sipas Ahmetajt, automjeti kushton vetëm 28 mijë euro, që për xhepin e tij është një shumë krejt normale. Nëse do të llogaritej se ku e kanë burimin ato lekë, sigurisht që nga xhepat e qytetarëve shqiptarë, të cilët nuk kanë luksin e blerjes së makinave luksoze. Shqiptarët aktualisht po luftojnë për bukën, e cila nuk dihet nëse do mund të blihet në vijim, pasi çmimi i saj po rritet.
Në reagimin e tij në “Facebook”, Ahmetajt duket se nuk i ka pëlqyer shkrimi i deputetit Paloka, teksa në fjalët e tij ka fjalë fyese ndaj demokratit.
“Ta kuptojnë zemrat e zjarrta që dhe njëherë tjetër shpërndanë një lajm qorr e thuthuq”, shkruan Ahmetaj.
Duhet përmendur se të tillë terma janë përmendur dhe nga të tjerë socialistë, ku ka pasur përplasje mes tyre dhe Palokës.
