Kryetari i Bashkisë së Tiranës, Erion Veliaj, njihet si një aktor specialist në bërjen e propagandës kur ndodhet para kamerave. Shumë e kujtojnë deklaratën e tij në media kur thoshte se Tirana do të ketë ujë pa ndërprerje dhe uji i rubinetit do të jetë i pijshëm. Por, pavarësisht se çfarë thotë ai në media, realiteti është krejt tjetër në terren. Qytetarët e Tiranës ende edhe sot përdorin depozitat sipër pallateve dhe tarracavave të shtëpive, pasi ujë 24 orë nuk ka dhe i rubinetit nuk është i pijshëm. Madje këtë na e tregoi edhe raporti vjetor i Entit Rregullator të Ujit që u depozitua në Kuvendin e Shqipërisë ditën e sotme, ku deklaronte se kohëzgjatja e furnizimit me ujë në Tiranë është 17 orë në ditë, ndonëse shpesh herë është artikuluar se furnizimi është minimalisht 18 orë në ditë.
Këtë realitet Veliaj na e tregon edhe me procedurat e prokurimit që bën. Në datën 25 Mars, Lali Eri ka hapur tenderin për të blerë ujë të pijshëm për punonjësit e Bashkisë së Tiranës. Tenderi mban numrin e referencës REF-22936-03-24-2022 dhe ka fondin limit prej 2.249.925 lekë të reja, ose rreth 23 milionë lekë të vjetra. Tenderi është zhvilluar pa garë dhe vetëm me një kompani, “LAJTHIZA INVEST”, e cila nuk ka pasur asnjë konkurrent dhe është shpallur fituese. Siç e kemi thënë, procedurat me një konkurrent shfaq dyshime se fituesi mund të jetë i paracaktuar dhe ky tender i Bashkisë Tiranë është futur në kategorinë e flamurit të kuq nga “Open Data” me mbishkrimin e mungesës së konkurrencës.
Me këtë tender dalim në dy të vërteta, që vet i pari i Bashkisë së Tiranës nuk i beson ujit që po ua servir qytetarëve në rubinet dhe u thotë se është i pijshëm, duke blerë me taksat e qytetarëve ujë për të dhe administratën. Dhe e dyta, mirë që do të kujdeset për veten dhe administratën e bashkisë, por zhvillon edhe procedurat në shkelje të rregullave të prokurimit publik. Nuk është as hera e parë, as hera e fundit që gënjeshtrat e Veliajt dhe shpërdorimi i lekëve të taksapaguesve shqiptarë dalin sheshit me dokumente të vet institucionit që drejton, por nuk e dimë se kur do jetë hera e parë që institucionet e drejtësisë në vend do ta vënë para përgjegjësisë.
X.S/ Gijotina.com
Discussion about this post