Një nga dhomat e Repartit të Kirurgjisë u përfshi nga zjarri mëngjesin e sotën, por për fat të mirë flakët u vunë në kontroll duke shmangur një tragjedi të mundshme.
Ngjarja ka ndodhur rreth orës 07:05 të mëngjesit të kësaj të shtune në njërën prej dhomave të pacientëve në Shërbimin e Pneumologjisë, e për fat të mirë nuk ka persona të lënduar. Evakuimi i tyre është bërë në kohë, duke bërë që dëmi të jetë vetëm material.
Flakët janë neutralizuar në kohë nga shërbimi zjarrfikës, duke mos lejuar përhapjen e flakëve në dhomat e tjera.
Spitali Rajonal Shkodër bën me dije se shërbimi po vijon pa ndërprerje.
“Spitali Rajonal Shkodër bën me dije se në orën 6:45 të mëngjesit të sotëm, ka ndodhur një incident, ku ka rënë zjarr në njërën prej dhomave të pacientëve në Shërbimin e Pneumologjisë. Pacientët janë evakuuar në kohë dhe nuk ka patur të lënduar.
Zjarri është shuar menjëherë, duke mos lejuar përhapjen në dhomat e tjera. Spitali Rajonal i Shkodrës siguron se shërbimi vijon pa ndërpreje teksa po merren masa të menjëherëshme për riparimin e ambientit ku ka ndodhur incidenti”, thuhet në reagim e këtij institucioni.
Grupi hetimor vijon punën për zbardhjen e shkakut të rënies së zjarrit, ku paraprakisht dyshohet aksidental.
Discussion about this post