Kreu i Policisë së Shtetit, Skënder Hita, u kërkoi drejtuesve dhe efektivëve blu që drejtuesit e automjeteve të mos ndalohen pa shkak, por të përdoret teknologjia, poliskani, mjetet shpejtësi-matëse dhe dronët.
Por, sa radarë ka realisht në terren? Ish-kreu i Policisë Rrugore, Krenar Ahmeti, u shpreh në “Aldo Morning Show” se nuk ka mjaftueshëm radarë për të kapur shkeljet rrugore.
“Nuk i kemi parë radarët, mo vëlla. Dëgjo, një ose dy radarë nuk mund të zgjidhin punë. Të lutem”, tha ai.
Për funksionimin e radarëve, Ahmeti u ndal te një eksperiencë personale, në vitin 2010, kur ai ndodhej në terren. Gjatë një kontrolli në autostradë, radari regjistroi gabimisht një kamion duke ecur me 160 km/orë. Pas verifikimit praktik nga vetë polici, rezultoi se kamioni nuk e kalonte 95 km/orë. Në fakt, radari kishte kapur shpejtësinë e një makine tjetër në korsinë e shpejtësisë, por kishte fotografuar kamionin si shkelës.
“Të tregoj një situatë të vërtetë, që edhe komuniteti të kuptojë se sa e shkelim ne si policë. Kishim vënë radarin në autostradë, në vitin 2010. Po fokusonim mjetet që ecnin me shpejtësi. Në një moment, radari kap një mjet trailer, maune i thotë populli, ose kamion i madh, rreth 30 e ca ton. Edhe 160 tregonte aparati. U tensionuam. Ndaluam automjetin. Filloi shoferi duke protestuar “në mënyrë kategorike”. Ne në një farë mënyre po i kërkonim llogari si mundesh ti me ec me 160, jo i thoshim, a e sheh në radar. “Në mënyrë kategorike”. Tha: “Mos më prekni bukën e kalamajve, se ky mjet nuk e kalon 95 km/orë”. U detyrova, i hipa vetë kamionit, futa kartën time për ta provuar. Kamioni nuk e kalonte 95. Okej, tani stop operacionit. U ktheva për të marrë katalogun e radarit që më kishte pajisur shteti nga fillimi deri në fund të gjitha. Dhe konstatova: janë dy korsi, ai detektonte makinën që ecte në korsinë e shpejtësisë dhe kishte fotografuar kamionin”, u shpreh ai.
Marrë shkas nga kjo ngjarje, Ahmeti tha se asokohe bëri një relacion, dhe rezultoi se pajisjet ishin të përshtatshme vetëm për rrugë me një korsi dhe jo për autostrada.
Ish-kreu i Rrugores pretendoi se këta radarë, të cilësuar prej tij kinezë, ishin blerë me çmim shumë më të ulët, rreth 3 mijë euro, por i ishin shitur shtetit me një vlerë prej rreth 50 mijë euro.
“Dhe unë bëra një relacion, nga A te ZH. Se do ju tregoj të vërtetën se çfarë ka ndodhur. Flas për vitin 2010-2011. Këta radarët i kishin blerë 3 mijë euro. I kishin shitur shtetit 50 mijë euro. Po, tetë radarë kishim. E bëra një relacion: këta janë vetëm radarë kinezë, por janë vetëm për rrugët interurbane dytësore, nga një korsi për sens. Vetëm një makinë mund të detektojë. Nëse vjen një makinë paralel, e detekton, por nuk kishte një përputhje mes detektimit dhe fotografimit të mjetit. M’i hoqën mua radarët dhe i çuan nëpër qytete. Me ata radarë kanë hedhur grepin dhe kanë mbushur xhepin, jo vjedhje, super vjedhje kanë bërë. Ku dua të dal: vërtet teknologjia, por teknologjia duhet të jetë patjetër e certifikuar nga metrologjia”, tha ai.
Në fund, Ahmeti pretendon se pas vitit 2013, disa punonjës policie kanë blerë vetë radarë në mënyrë private, pra jashtë procedurave zyrtare të institucionit.
“Çfarë ka ndodhur me policët, kanë blerë radarë në mënyrë private, pas 2013. A doni të vërtetat? Kjo është e vërteta”, përfundoi ai.
Discussion about this post