Radhë kilometrike në autostradën e re Thumanë-Kashar, hiqet përkohësisht pagesa

Është hequr përkohësisht pagesa në autostradën Thumanë-Kashar për shkak të radhëve kilometrike të krijuara.

Dy sportelet raportohet se nuk përballojnë dot fluksin e automjeteve.

Pagesa e tarifës në sportele krijonte radhë të gjata makinash në autostradë duke bllokuar kështu qarkullimin.

Mëngjesin e sotëm radha e mjeteve i kalonte 10 kilometra dhe filloi nga dalja e autostradës në afërsi të Rinasit, deri tek fshatit Larushk.

Sportelet e vendosura nga firma koncesionare nuk ishin në gjendje të perballonin fluksin e madh të mjeteve që përshkojnë këtë aks nga veriu në drejtim të Shqipërisë së mesme.

Qytetarët, të cilët e kanë përshkruar këtë rrugë, kanë shprehur pakënaqësi të mëdha sa i përket dhe tarifës që duhet të paguajnë.

Sot tarifa ishte 270 lekë për të kaluar në autostradë, tarifë që dyfishohet për ato që do të duhet të rikthehen edhe një herë në Tiranës.

Kjo është një tarifë shumë e lartë krahasuar me të ardhurat dhe çmimin e lartë të karburantit.

Raportohet se disa postera janë vendosur nga ana e kompanisë nëpër sportele ku thuhet se janë në fazë kolaudimi.