Kryeministri Edi Rama vijon të mbajë një qëndrim të distancuar ose mbi palët lidhur me atë se çfarë ndodh në veriun e Kosovës, ndërsa bën përgjëgjësi njëlloj si Serbinë edhe Kosovën, për situatën e krijuar.
Në një postim në rrjet, ku njofton një takim me Presidentin e Këshillit Europian, Charles Michel, Rama shkruan “ishim të një mendje se lirimi i tre policëve të Kosovës sot ishte një lajm shumë i mirë, megjithëse i vonuar!”
Në vijim, Kryeministri thekson se “domosdoshmëria e de-eskalimit të menjëhershëm, e cila është rruga e duhur drejt fazës finale të Dialogut për Marrëveshjen e Normalizimit mes Kosovës e Serbisë, duhet kuptuar qartë nga të dyja palët edhe si një detyrim madhor ndaj krejt rajonit, i cili nuk mund të merret peng nga askush”.
Nga momenti që nisën tensionet në veriun e Kosovës dhe pati një përshkallëzim të tyre, Kryeministri Rama ka mbajtur një qëndrim të fortë kritik ndaj Albin Kurtit, madje duke e paralajmëruar në emër të aleatëve për vendosjen e sanksioneve ndaj Kosovës. Një ditë pas gjuhës së ashpër të Ramës, brenda territorit të Kosovës, forcat serbe rrëmbyen 3 policë të Kosovës, të cilët u liruan pas më shumë se 10 ditësh.
Discussion about this post