Rusia përdori një armë të ndaluar termobarike gjatë luftimeve në Ukrainë këtë të hënë. Kështu është shprehur ambasadorja ukrainase në Shtetet e Bashkuara të Amerikës para ligjvënësve amerikanë në një konferencë për mediat.
“Ata përdorën bombën me vakum, e cila në fakt është e ndaluar nga konventa e Gjenevës,” u tha Oksana Markarova gazetarëve pasi doli nga konferenca e kongresit.
Pavarësisht deklaratës së ambasadores, burime nga BBC shkruajnë se një pretendim i tillë nuk është konfirmuar zyrtarisht. Armët termobarike nuk përdorin municionin e zakonshëm.
Ato janë të mbushura me një eksploziv me presion të lartë dhe thithin oksigjen nga mjedisi përreth për të gjeneruar një shpërthim jashtëzakonisht të fuqishëm dhe valë presioni.
Ato janë përdorur edhe më parë në republikën ruse të Çeçenisë, sipas Human Rights Watch. Ditën e shtunë, CNN raportoi se kishte parë një raketë termobarike pranë qytetit rus të Belgorod.
Discussion about this post