Ministri për Kthim dhe Komunitete në qeverinë e Kosovës, Goran Rakiq ka kërcënuar të largohet nga qeveria Kurti me një kusht. Ai deklaron se nëse nuk formohet Asociacioni i Komunave me Shumicë Serbe deri në fund të vitit ai do të japë dorëheqje nga të gjitha pozitat dhe do të largohet nga institucionet e Republikës së Kosovës.
“Nëse nuk krijohet Asociacioni i Komunave me shumicë serbe deri në fund të vitit, unë do t’i informoj të gjithë faktorët relevantë se do të largohemi nga të gjitha institucionet e Prishtinës në veri, në të gjitha nivelet”, tha Rakiq në konferencë.
Kjo deklaratë vjen pas marrëveshjes së fundit për targat në Bruksel, ku pala serbe ka paralajmëruar se në takimin e ardhshëm të dialogut tema e parë që do të diskutohet do të jetë themelimi i Asociacionit të Komunave me Shumicë Serbe.
Ministri për Komunitete dhe Kthim, Goran Rakiq, e krahasoi aksionin e policisë së Kosovës kundër kontrabandës në disa zona të Kosovës, përfshirë veriun, me “natën e kristaltë”, duke thënë se serbët nuk durojnë më.
Gjithsesi, këto deklarata nuk ia rrezikuan vendin në Qeverinë e Kosovës, Rakiqit.
