Ka përfunduar në Tiranë takimi informal, ose dreka e punës, mes kryeministrave të vendeve të Rajonit dhe Komisionerit për Zgjerimin, Oliver Varhelyi.
Takimi është përmbyllur me një drekë, ndërsa prej të paktën 4 orësh, Edi Rama mikpriti në vilën nr.30 në Tiranë Kryeministrat e Maqedonisë së Veriut, Malit të Zi, Bosnjes, Serbisë si dhe Komisionerin për Zgjerimin Varhelyi.
Në qendër të këtij takimi ishte procesi i Berlinit, samit që do të mbahet po në Tiranë në muajin tetor.
Në takimin e sotëm nuk ishte prezent Kryeministri i Kosovës Albin Kurti, i cili merrte pjesë në një konferencë që organizohej në Greqi.
Sipas raportimeve, mësohet se në drekën e punës, Kryeministri Edi Rama ka vënë theksin në nevojën e pasjes së një qëndrimi të unifikuar të kërkesave për BE gjatë Samitit të Procesit të Berlinit në Tiranë pas dy muajsh.
Takimit informal që supozohej të ishte 6+1 por u zhvillua 5+1 i parapriu një turi ballkanik dy ditor i kryeministrit Edi Rama në çuarjen përpara të Procesit të Berlinit, në një kohë që Shqipëria mban kryesimin e kësaj nisme.
Kryeministri Edi Rama iu rikthye procesit të Berlinit duke e paraqitur si një nismë shumë të domosdoshme, ndërsa për gati 3 vite u investua në atë që u pagëzua si “Open Balkan”, e cila u mbështet fuqimisht nga Serbia dhe më pas nga Maqedonia e Veriut.
Discussion about this post