Nga Agim Nesho
Gjithë diskutimi i ditëve të fundit u përqendrua në turin ballkanik të zotit Rama nën pretekstin e Procesit të Berlinit. Në fakt nuk ishte kjo arsyeja, as protagonizmi i tij i thekur, përpara ndihmës që duhet ti jepte Vuçiç për çuarjen e çështjes së Veriut të Kosovës në Këshillin e Sigurimit të OKB-së. Ai do të ishte i vlefshëm për Vuçiç dhe serbët që për këtë çështje jetike për të ardhmen e shtetit të Kosovës dhe kombit Shqiptar të bënte indiferentin dhe ti “bashkohej komunitetit ndërkombëtar me të cilin bashkëpunonte ngushtë”!!
Asnjëherë dhe asnjë rast nuk ka pasur një mungesë qëndrimi nga shqiptarët dhe liderët shqiptarë për çështjen e Kosovës.
Që turi i Ramës në Ballkan ishte ne interes për Vuçiç janë shumë elemente që plotësojnë logjikën:
Së pari, Rama u përpoq të ‘distancohej’ nga Ballkani i Hapur, që ishte projekti i jetës së tij dhe Vuçiç, për tu bërë i besueshëm për Kosovën dhe vizitën e tij të artë. Mospritja e Ramës nga Kryeministri Kurti ishte një goditje e rëndë për Ramën dhe pozicionin e tij të ardhshëm si përfaqësues i shqiptarëve në rajon.
Së dyti, Rama kishte kohë që përmendte situatën në Kosovë si një situatë të ngjashme me situatën në Donbas të Ukrainës. Këtë ide, që ju shërben politikave serbo-ruse për të tërhequr paralele midis dy konflikteve, e shpreh hapur edhe Vuçiç, i cili sipas medias ndërkombëtare ka thënë se ‘Albin Kurti si Zelenski kërkon të bëjë një kundër-ofensivë në Veriun e Kosovës për të bërë spastrim etnik ndaj serbëve sic po bën ushtria ukrainase në Donbas’…unë do flas me Sekretarin e Përgjithshëm të NATO-s dhe do të kërkoj trajtimin e kësaj çështje në Këshillin e Sigurimit”.
Rikthimi i çështjes së ‘Donbasit’ në konferencën për shtyp në Beograd ishte një ngritje topi për presidentin Vuçiç, i cili pasi mori përgjigjen idiote të Ramës ‘që do ta diskutojmë me partnerët tanë ndërkombëtare” duke marrë në heshtje neutralitetin e Shqipërisë dhe zgjidhjen e çështjes nga të mëdhenjtë e politikës botërore, vazhdoi të bisedojë me Makron dhe ta bëjë një çështje konkrete për Këshillin e Sigurimit të OKB-së. Dje zëdhënësja e Ministrisë së Jashtme të Rusisë, Zakharova, deklaroi që Rusia përkrah zhvillimin e një sesioni special për Veriun e Kosovës në Këshillin e Sigurimit të OKB-së. Kërkesa për një sesion special mundet edhe kur 9 vende nga 15 janë dakort me propozimin.
Pra, indiferenca e Ramës rëndon dyfish, aq më tepër që Shqipëria është anëtare e Këshillit të Sigurimit të OKB për periudhën 2022-23, dhe jo vetëm nuk ka ndërmarrë një aksion sensibilizues në favor të Kosovës për atë që kërkojnë serbët, por mbështet rrezikun që mund të sjellë ridiskutimi i kësaj cështje në Këshillin e Sigurimit, ku janë vendim-marrës edhe Kina dhe Rusia.
Jetojmë në një kohë kur kompromiset e mëdha dhe pragmatiste për të shmangur luftën po bëhen gjithmonë e më prezente. Revizionizmi i Rusisë për të rritur zonat e influencës në Europë dhe në Ballkan ka rritur edhe veprimin e perëndimit në gjetjen e kompromiseve momentale për të mos rrezikuar paqen. I vetmi ndryshim është se në konfliktin në Veriun e Kosovës ka vetëm një palë dhe këta janë nacionalistët serbë që edhe provokojnë edhe marrin rolin e paqedashësit. Fatkeqësisht në këtë konflikt po shikojmë që qeveria Shqiptare dhe Rama jo vetëm janë non-ekzistentë në mbrojtjen e interesit kombëtar por janë bërë zgjatim i interesave revizioniste të Serbisë. /Syri.net/
Discussion about this post