Rama debat me gazetarin, reagon Açka: Të hapim një shkollë për riedukimin e kryeministrave

Deputetja e Partisë Demokratike, Flutura Açka ka reaguar në lidhje me debatin që pati dje kryeministri Edi Rama me një gazetar. Ditën e djeshme gjatë një konference për mediat kryeministri iu kthye ashpër dhe i ndaloi pjesëmarrjen në konferenca të tjera gazetarit, pasi  nuk i pëlqeu pyetja që i bëri. Përmes një mesazhi në ‘Facebook’ Açka ka shprehur solidaritet për gazetarët, ndërsa shton se fjala “Riedukim” që u përdor nga Rama për gazetarin, sipas saj është marrë borxh nga diktatura.

“E kush e mendonte se njeriu që dikur është rrahur për fjalën e lirë, të kthehej në harbutin e mediave kur të ishte në pushtet. Në solidariteit me gazetarët! Si mund të kalojë nëpër duart e pushtetit të tij për t’u votuar Statusi i gazetarit? Do ta kthejë në “Urdhri i gazetarit”, ose më keq akoma, në “Spaçi i gazetarit”. Fjala “Riedukim” në demokraci është marrë borxh nga diktatura.Në fakt na duhet të hapim me ligj një shkollë, atë riedukimit të Kryeministrave të Demokraturës”, shkruan ajo. Kjo ishte hera e dytë që Rama i ndalon një gazetari të marrë pjesë në konferenca.