Rama e ktheu në ‘tokë e djegun’, burrat e Mirditës nisen drejt Thethit në mbështetje të banorëve

Një grup banorësh nga Mirdita u nisën drejt Thethit, në shenjë solidariteti me banorët e zonës së Dukagjinit.

Nën moton “Mirdita solidarizohet me Dukagjinin”, kjo iniciativë vjen si shprehje e mbështetjes për banorët në Shalë e Shosh, të cilët po përballen me sfida serioze që prekin jetesën, trashëgiminë dhe të ardhmen e tyre në këto treva historike.

Mirditorët u shprehën se ky udhëtim nuk është thjesht simbolik, por një thirrje për ndërgjegjësim kombëtar dhe veprim konkret.

“Jemi nisur për të shkuar në drejtim të Thethit, një grup mirditorësh intelektualë. Ne po shkojmë në shenjë solidariteti. Do të jemi në mbështetje të tyre”, është shprehur një prej tyre.

“Kur shteti kthehet në agresor, populli mbledh kanunin. Është një reagim për t’u mbrojtur. Kryeministri është kthyer në agresor, në njërën anë shkon para votimeve për t’u thënë i gëzofshi e në anën tjetër shkon e ua prish. Nuk ka pabesi më të madhe sesa t’i prishësh tokën e banesën e ndërtuar brez pas brezi sepse nuk është ‘tokë e xanun’, por e trashëguar brez pas brezi”, deklaroi një tjetër qytetar.

Edhe ish-deputeti Kujtim Gjuzi iu bashkua thirrjes teksa tha se kryeministri duhet të dëmshpërblejë banorët në Theth.

“Ne si konservatorë i jemi përgjigjur thirrjes së tyre për të qenë në Theth. Thethi është i thethjanëve. Të shkosh në Theth e t’u prishësh bizneset është një krim bastard. Ky është një dëm që duhet shlyer e kjo bëhet me dëmshpërblim familje për familje. Edhe me kanun dëmi duhet dëmshpërblyer”, është shprehur Gjuzi.

“Mirdita ka qenë krah për krah me pjesën tjetër të Veriut në kohë vështirësish, sot rikonfirmon lidhjet e gjakut, të besës dhe të trashëgimisë kulturore me Dukagjinin”, thanë banorët të cilët u bashkuan për të qenë në Theth, ndonëse aksioni u përmbyll mbrëmjen e së hënës.