Edhe pse kryeministri Edi Rama e ka përjashtuar si mundësi, deputeti socialist Arben Pëllumbi, thotë se Presidenti i ri mund të dali edhe nga brenda radhëve të grupit parlamentar socialist. Pëllumbi tregoi edhe hapat që do të ndjekë procesi deri në raundin e katërt. Ai tha se do të jetë Kryesia e PS ajo që do ta përcaktoj përfundimisht kandidatin.
“Ajo që do të ndodhë është që ne do t’i rikthehemi procesit që nisëm. Ne e nisëm duke mbledhur emra nga Grupi Parlamentar dhe qytetarët përmes adresës elektronike. Ne do të fillojmë prapë procesin brenda vetes tonë për të gjetur emrat konkretë. Sigurisht që pjesa më e rëndësishme do të zhvillohet në grupin socialist Parlamentar. Me siguri do të kemi një mbledhje Kryesie të PS-së, dhe më pas Konferenca e Kryetarëve do të vendosë për raundin e radhës. Secili nga ne është i lirë për të diskutuar dhe propozuar në Grup dhe në Kryesi që do të japë edhe verdiktin final. Brenda deputetëve socialistë ka pasur qëndrime të ndryshme sa i përket kushtit që kandidati nuk duhet të jetë një nga deputetët. Ky kusht u vendos meqenëse u ftua opozita në bashkëbisedim dhe nuk donim që të paragjykohej maxhoranca sikur do të zgjidhte një nga deputetët. Opozita mund të propozojë ende edhe në raundin e katërt, mjafton ta propozojnë 20 firma deputetësh” – tha ai.
Discussion about this post