Kryeministri Edi Rama ka pranuar sot për herë të parë se ish drejtorit të Policisë së Shtetit Gledis Nano i është kërkuar dorëheqja.
Por diçka nuk shkoi dhe Rama la të kuptohej se Nano nuk e ka dhënë dorëheqjen, duke detyruar kryeministrin ta shkarkojë me vendim qeverie, dy ditë pas bisedës së bërë mes ish drejtorit dhe ministrit Bledi Çuçi.
“Ju kujtoj që Muhamet Rrumbullaku nuk vjen nga portalet, por nga disa vite punë në drejtimin e Agjencisë së Mbikëqyrjes Policore. Ato çiftelitë dhe ato daullet e risjella 10 vjet më pas në skenë për arsye që unë i di, nuk kanë vlerë. Muhamet Rrumbullaku është një vlerë e shtuar me një autoritet të padiskutueshëm nga askush deri më tani në aspektin e ndershmërisë profesionale e uroj që të ketë sukses të plotë. Të tjerat janë të gjitha për konsumin e përditshëm të vorbullës së llumit ku duhet të jetojmë të gjithë në. Po është e vërtetë i është kërkuar dorëheqja drejtorit të mëparshëm e ai ma ka konfirmuar se do ma jepte dorëheqjen, ditën e hënë pasi biseda ishte bërë të shtunën nga ministri, pasi ishim shumë të shqetësuar për zhvillime të papëlqyeshme me rendin publik dhe me vetë policinë e Shtetit, çështje që janë trajtuar me drejtorin e mëparshëm të policisë”, tha Rama.
Discussion about this post