Kryeministri i Shqipërisë, Edi Rama, ka postuar një foto në median sociale Facebook, ku shkruhet “Eksportet, rekord historik, 109 miliardë lekë, janar-prill”.
Bazuar te të dhënat e Institutit Shtetëror të Statistikave, INSTAT, eksportet gjatë muajit prill 2021 janë rritur me 92.3%, në krahasim me të njëjtën periudhë të një viti më parë.
Për katërmujorin, eksportet u rritën me 35% me bazë vjetore, duke arritur në 109 miliardë lekë.
Pas muajit mars, eksportet kanë vijuar të kenë rritje, duke rikuperuar humbjet që u shënuan në të njëjtët muaj të vitit 2020. Fuqizimi i masave anti-Covid, që erdhi me karantinën apo me mbylljen e dyqaneve në të gjithë Evropën, ishte arsyeja kryesore që ndikoi në rënien e eksporteve në vendin tonë.
Eksportet e prillit të vitit 2021 kanë kaluar edhe ato para krizës. Në prill të vitit 2019, eksportet kanë qenë 7.3% më pak.
Ecurinë më pozitive për eksportet e kanë pasur metalet, si rrjedhojë e rritjes së kërkesës dhe shtrenjtimit të ndjeshëm të çmimit.
Ecuri negative ka treguar sektori i tekstileve dhe këpucëve, si pasojë e masave të reja të vendosura muajt e fundit, në të gjithë Evropën. Sipas të dhënave, ky sektor ka patur një rritje prej 17% për 4-mujorin në raport me janar-prill 2020, por shitjet e këtij grupi vijojnë të mbeten 13% më të ulëta në raport me 4-mujorin e 2019-s.
