Kryeministri Edi Rama, në nisje të podcastit të tij “Flasim”, foli për zgjedhjet e pjesshme të 9 nëntorit në Tiranë. Ai u shpreh se Tirana nuk mund të presë më për t’u rikthyer në rrugën e zhvillimit.
Pasi lëvizi çdo gur për ta shkarkuar nga drejtimi i Tiranës, Rama mundohet t’i bëjë qejfin sadopak Veliajt në qelinë e Durrësit duke u shprehur se kryetari i bashkisë u mor nga zyra pa gjyq dhe u çua në paraburgim, ku vazhdon të mbahet prej 8 muajsh, përmes një procesi me standarde të dyshimta.
Rama komentoi debatet mbi legjitimitetin e dekretit të Presidentit për shpalljen e zgjedhjeve të parakohshme në Tiranë, duke kritikuar ata që sipas tij nuk kuptojnë bazën kushtetuese të këtij vendimi.
“Tirana mbeti pa kryetar bashkie si pasojë e një zhvillimi brutal të lidhur me drejtësinë. Kryetari i bashkisë u mor nga zyra pa gjyq dhe u çua në paraburgim ku vazhdon të mbahet ende prej 8 muajsh, përmes një procesi me standarde të dyshimta. Por ndërkohë Tirana nuk mund të presë më. Kush thotë të kundërtën thjesht nuk e ka idenë se cfarë duhet që kjo lokomotive e Shqipërisë të ecë me ritmin e duhur.
Ndërsa ata që diskutojnë legjitimitetin e dekretit të presidentit për zgjedhje, nuk kanë faj, se nuk kanë as shkollën, as pavarësinë intelektuale dhe as dijen mbi kushtetutën të Ilir Rusmalit, këshilltarit juridik të presidentit dhe ministrit të Drejtësisë të PD, i cili për hir të integritetit të tij dha dorëheqjen dhe nuk pranoi të bëhej palë me korrupsionin.”- tha Rama.
Discussion about this post