Rama flet për vrasjen e Egli Progës: Ishte anëtar i PS, një prokuror i paaftë ndryshoi akuzën

Kryeministri Edi Rama në mbledhjen e Asamblesë foli dhe për vrasjen e Egli progës në Pogradec, ku tha se nuk ishte e vërtetë që ai u vra për shkak të gjobvënies. Rama foli edhe për prokuroren e çështjes që ndtryshoi akuzën nga vrasje me dashje në vrasje nga pakujdesia, duke thënë se bëri politikë  dhe jo hetim të paanshëm.

Rama u shpreh se autori i krimit nuk kishte mbrojtje politike, “PS nuk mbron ministrat, dhe jo më një punonjës, i cili nuk është anëtar i PS, madje ka qenë i dënuar më parë”, u shpreh ndër të tjera Rama

“U mobilizuan ta përdorin vrasjen e një djali të ri në Pogradec si overdozë helmi për të nxitur urrejtjen ndaj nesh. U prodhua një film i kronikës së zezë ku u mblodhën bashkë të tëra të këqijat e mundshme. Komunikata e policisë u hodh në cepat e lajmeve dhe komenteve mediatike, që i dominoi fantazia kriminale e gënjeshtareve dhe gjuha ekstremiste e spekulantëve.

Për të kuptuar kush janë ata në politikë dhe media, mjafton rasti i vrasjes së një djali të ri në Pogradec.

U vu kuja se policia kishte tentuar ta fshihte krimin. Gënjeshtër. Shpejtësia dhe ndalimi i autorit është dokumentuar. U tha se ambulanca erdhi 40 min me vonesë, gënjeshtër. Mbërritja e ambulancës është e dokumentuar.

U përhap përralla se autori kishte mburojë politike, gënjeshtër. Jo vetëm dihet botërisht që PS nuk mbron as ministrat, por në rastin konkret ai dajë në fjalë që dikur ka qenë pjesë e PS është një person i dënuar me detyrën dhe prej kohësh nuk ka asnjë angazhim me PS. I ndjeri po, ai ishte anëtar me tesër i PS dhe nuk ishte pronari i lokalit ku ndodhi përplasja, por punonjës i OSSHE.

Derisa e vërteta të veshtë pantallonat gënjeshtra me 7 bishta e bëri 7 xhiron e vendit tonë. Edhe me ndihmën  e një prokurori të paaftë, që pa kryer asnjë hetim ndryshoi përcaktimin e policisë si vrasje me dashje në vrasje nga pakujdesia duke revoltuar të madh dhe të vogël. Kështu popullit ju dha pa pikë turpi dhe mëshirë doza e helmit për të bërë politikë me një vdekje tragjike. Derisa duke organizuar një protestë mashtruese kundër qeverisë, ndërkohë që çështje ishte dorëzuar korrektësisht nga policia në duart e pushtetit gjyqësor.

Për të larë ujin e trashë me të hollin, prokuroria mori një të pandehur një polic patrulle, duke treguar se as nuk e ka haberin e rolit të patrullës në raste të tilla.

Por më keq akoma, duke bërë politikë, në vend që të bënte të vetmen punë që duhet të bëjë, hetim të drejtë, të paanshëm dhe të drejtë. Kjo nuk është as e para, as e fundit, lojë politike e mediatike”, tha ai