Ekspertët e ekonomisë në vend shprehin shqetësimin për nivelin e lartë të të borxhit publik, duke thënë se po shënon nivelin më të lartë prej vitesh. Në fund të 2020-ës, të dhënat tregojnë se borxhi publik arriti në rreth 77.8% të Prodhimit Kombëtar. Situata do të rëndohet akoma më shumë ku parashikimet tregojnë se në fund të këtij viti parashikohet të arrijë në 80%. Ndërsa Ministria e Financave ka bërë publike planet e saj për të marrë edhe 500 milionë euro të tjera, ku një pjesë e tyre do të shkojë për shlyerjen e eurobondit të 2020-ës, si dhe ka shtyrë për në 2022 detyrimet për të filluar reduktimin e borxhit publik.
Kjo situatë nuk është aspak e mirë prandaj, eksperti Enriko Ceko bën thirrje që ky ritëm i rritjes së borxhit duhet të ndalojë, ndryshe pasojat mund të jenë të mëdha. “Në pesë vitet e fundit borxhi është rritur me diku tek 3 mld lekë. Kjo duhet të ndalojë. Shqipëria nuk ka luksin të marrë borxh, sepse edhe borxhin e brendshëm e ka të tmerrshëm. I detyrohet shumë para edhe qytetarëve të saj, para që mund të ishin investuar në ekonomi”, tha ai.
Ndërkohë në prezantimin e programit qeverisës, kryeministri u shpreh se borxhi publik do të ulet në 60%. Sipas ekspertit Ceko premtimi i Ramës nuk është realist. Nga njëra anë për të arritur objektivin qeveria ka ulur shpenzimet publike, por sipas ekspertit Ceko ka edhe një mënyrë tjetër më efektive. “Duhet që kompanitë shqiptare të gjejnë avantazhin konkurrues në tregjet ndërkombëtare. Është e vetmja mënyrë, që vendi ynë të ndërtojë një ekonomi të fortë dhe solide”, u shpreh ai gjatë një interviste televizve.
E.H/ gijotina.com/
