Kryeministri Edi Rama ka vijuar edhe këtë të martë sulmet publike ndaj Dritan Goxhajt, duke e cilësuar atë si dezertor të Ushtrisë Çlirimtare të Kosovës.
Në një reagim të publikuar në rrjetet sociale, Rama ka shpërndarë një dokument që, sipas tij, i përket UÇK-së dhe ku pretendohet se Goxhaj nuk pranoi të bëhej pjesë e luftës në Kosovë, ndryshe nga babai i tij, Dylaver Goxhaj, i cili në atë periudhë ishte i angazhuar si vullnetar në Shtabin e Përgjithshëm të UÇK-së.
Pas deklaratave të kryeministrit, në rrjetet sociale dhe media është publikuar një dokument tjetër që, sipas mbështetësve të Goxhajt, vërteton se ai ka shërbyer në radhët e Ushtrisë Çlirimtare të Kosovës nga 1 marsi 1999 deri në përfundim të luftës. Në dokument thuhet se Goxhaj ka mbajtur detyrën e komandantit të një batalioni gjatë periudhës së konfliktit.
Debati mes palëve ka ngjallur reagime të shumta, ndërsa çështja është kthyer në një përplasje publike pas pjesëmarrjes së Goxhajt në protestën para Kryeministrisë. Deri më tani nuk ka pasur një reagim zyrtar nga institucionet përgjegjëse lidhur me dokumentet e publikuara.
Ndërkohë, në një tjetër front politik, prej 23 ditësh me radhë, mijëra qytetarë të mbledhur në protestat e zhvilluara në shesh kanë ngritur akuza të forta ndaj kryeministrit Rama, duke e cilësuar atë tradhtar të interesave kombëtare dhe duke kërkuar largimin e tij nga politika.
Një ditë më parë u mbajt protesta e 23-të masive, ku pjesëmarrësit kërkuan ndryshimin e establishmentit politik dhe dorëheqjen e qeverisë.
Discussion about this post