Në konferencën pas hapjes së negociatave, kryeministri Edi Rama tha se nuk ka preferuar që të flasë gjatë.
Ai u shpreh se falenderoj gjithë gazetarët që janë aty të pranishëm dhe se do të donte t’u përgjigjej pyetjeve të tyre.
“Falenderoj të gjithë përfaqësuesit e medieve që kanë ardhur nga Shqipëria për këtë konferencë shtypi historike. Po ia kaloj fjalën komisionerit që pastaj t’i përgjigjemi pyetjeve”, u shpreh Rama.
Kreu i qeverisë preku në fjalimin e tij gjithçka, që nga lufta në Ukrainë, sulmi kibernetik nga një vend armiqësor, reforma në drejtësi, madje edhe bashkëpunimi me shoqërinë civile dhe lirinë e medias.
Por një term që Rama nuk e përmendi në asnjë moment ishte opozita. Pakica nuk ishte pjesë e fjalimit të kreut të qeverisë por as edhe pjesë e delegacionit zyrtar që e shoqëroi në Bruksel.
“Ne jo vetëm që do të vazhdojmë të raportojmë periodikisht për negociatat në Parlament dhe Këshillin kombëtar për Integrimin Europian, por do të gjejmë mënyra me ndihmën tuaj për të rritur cilësinë e këtyre proceseve duke përmirësuar ndërveprimin me shumë aktorë të ndryshëm. Në të njëjtën kohë do të punojmë që kritika e shoqërisë civile dhe liria e mediave të vazhdojnë të inkurajohen në mënyrë që qytetarët të mbeten të vetëdijshëm dhe vigjilentë sa qeveria që përpiqet të jetë për sfidat dhe mundësitë e kësaj rruge të re drejt anëtarësimit në BE”, tha Rama.
Discussion about this post