Kryeministri Edi Rama ka folur në konferencën e 18 të Kryetarëve të Parlamenteve tē nismës Adriatiko-Jonian, ku janë të pranishëm krerët e parlamenteve të vendeve të rajonit.
Rama tha se është shumë e rëndësishme që të shtohen bashkëpunimet rajonale, në mënyrë që procesi i integrimit të vijojë sa më shpejt.
“Historia na ka caktuar apo na caktoi një izolim shumë të vështirë, me një barbari të spikatur, e sidoqoftë shkalla e transformimit që Shqipëria ka përjetuar është shumë shumë e madhe. Mundësitë e të sotmes janë po ashtu shumë shumë të mëdha. Kjo nismë është diçka që i shtohet nismave gjithnjë e më të shpeshta, në kundërte paqes dhe të bashkëpunimit. Ky është një moment shumë i rëndësishëm në historinë tonë, për të bërë çdo gjë që mundemi për të forcuar bashkëpunimin tonë në rajon. Të gjithë ne e kemi kuptuar që procesi i Integrimit nuk është i lehtë, në momentin që flasim, Shqipëria është në një proces të çuditshëm bllokimi, është nga ato situata që vetëm BE mund ta krijojë. Nuk ka ndonjë shpjegim të matur se si mund të trajtohet, si mund të mbetesh peng i mosmarrëveshjeve mes dy vendeve të tjera. Por kësisoj na duhet të ecim përpara, dhe të mos e humbasim durimin, pasi Europa është e vetmja gjendje e natyrshme e Shqipërisë,” është shprehur Rama.
Kryeministri ka vazhduar më tej duke u shprehur se për disa Europa është si një bankomat, ndërkaq për vendin tonë është zgjedhja e parë me vullnet të lirë në histori, duke e cilësuar si plani A, B, C.
Discussion about this post