Kryeministri këtë të mërkurë ka qenë në Kashar ku ka inspektuar nga afër ndërtimin e tre fabrikave të reja me mbështetje nga Agjencia për Zhvillim Bujqësor dhe Rural.
Kreu i qeverisë përmes një postimi në Facebook shkruan se ky është një projekt që financohet përmes programit IPARD, të cilat janë pjesë e gjeneratës tjetër të pionerëve të zhvillimit ekonomik e bujqësor të Shqipërisë, që do të hyjnë së shpejti në prodhim duke i dhënë një shtysë të re përpara punësimit cilësor, eksporteve dhe sigurisë ushqimore të vendit.
Ndër të tjera në këtë inspektim Rama është njohur me detaje në lidhje me funksionimin e këtyre fabrikave.
“Ne kemi kaluar fazën e prerjes së bagëtive nga fushë në thertore, por ka shumë për të bërë akoma, në momentin kur thertoret lidhen me një pikë si kjo dhe u rritet puna atëherë do të kemi një ndryshim çmimesh dhe kalimin në një tjetër nivel. Faza tjetër është kur ju të mundeni që të ktheni në energji për një blektorinë, duke i dhënë gjithë parametrat e duhura atyre që punojnë me ju”, ka thënë Rama.
Gjithashtu ai ka bërë me dije se me këtë standard është e rëndësishme që të hapet rruga e tregut.
