Kryeministri Edi Rama ka bërë me dije se njohja e patentave shqiptare në Gjermani është në fazën e fundit të miratimit në Bundesrat, dhomat e landeve gjermane.
Teksa ka replikuar me një komentues në lidhje me shërbimet e situatës në Drejtorinë e Transporteve, Rama shprehet se kjo arritje nuk do ishte e mundur në rast se ky institucion do të ishte i mbytur nga korrupsioni dhe injoranca.
Komentuesi: Më mirë të ishin të shkatërruara nga jashtë dhe të forta nga brenda, sesa kështu, ku u bëni ambiente luksoze, por të mbyt korrupsioni, injoranca, militantizmi e nepotizmi. Gjithsesi ti vazhdo t’u japësh ushqim shpirtëror kokëboshëve që të ndjekin. Në fund të fundit nuk ke shumë faj. Ata që të kanë vënë dhe mbajnë aty ku je, kështu ta kërkojnë ta luash pjesën.
Edi Rama: Kush merr shërbime sot në institucionet e Drejtorisë së Transporteve e di mirë se nuk të mbyt as korrupsioni, as injoranca, sepse shërbimet kalojnë përmes sistemeve digjitale që nuk njohin as militantë as kushërinj! Dhe kaq e vërtetë është kjo, sa që e provon fakti që procesi i njohjes së patentave shqiptare në Gjermani, gjë që as nuk mendohej dot deri disa vite më parë, sot është në fazën e fundit të miratimit në Bundesrat, dhoma e landeve të Gjermanisë! Sharjet e përqeshjet nuk janë argumente.
Kryeministri Rama është mjaft aktiv në rrjetet sociale ku herë pas here replikon me ndjekësit për çështje të ndryshme të aktualitetit.
