Kryeministri Edi Rama është në vazhdim të një fushate presionesh dhe kërcënimet ndaj Bashkimit Europian me të vetmin qëllim, nisjen e bisedimeve për çeljen e negociatave brenda këtij viti.
Gjatë një interviste për Georg Anastasiadis dhe Marcus Mackler të medias së njohur gjermane “merkur.de”, kreu i qeverisë është shprehur se integrimi i Ballkanit Perëndimor në BE i shërben sigurisë së unionit dhe se nëse BE nuk na pranon atëherë BP mund të bjerë nën ndikimin e të tjerëve. Rama madje i pyetur nëse i referohej Kinës dhe Rusisë për këtë rrezik, përmendi faktorin musliman në rajon, duke kërcënuar se mund të përdoret për radikalizim.
“Mos harroni se ne kemi të krishterë dhe myslimanë në rajon. Të lëmë Ballkanin Perëndimor të hapur si një portë për radikalizmin apo terrorizmin do të ishte çmenduri. BE-ja më në fund duhet ta kuptojë këtë”, tha kryeministri.
Në vijim, kreu i qeverisë ka folur për refuzimin e vazhdueshëm të BE-së për të nisur negociata dhe nëse do të ketë ndikim negativ tani që Kancelarja Merkel është tërhequr nga politika.
INTERVISTA
Angela Merkel është një nga mbështetëset tuaja. A është fundi i Kancelares një lajm i keq për planet tuaja në BE?
Kjo është ndoshta pak e tepërt për ta thënë. Por po, ajo kishte një farë ndjeshmërie ndaj shqetësimeve tona, që sigurisht ka të bëjë me të kaluarën e saj. Ajo u rrit nën një diktaturë komuniste dhe prandaj ndoshta na kupton më mirë se të tjerët. Unë rrallë kam takuar dikë që e njeh kaq mirë Ballkanin Perëndimor dhe problemet e tij. Ajo do të mungojë shumë jo vetëm në rajon, por edhe në të gjithë Europën.
Procesi i anëtarësimit ka qenë në stanjacion për një kohë të gjatë. Jeni të zhgënjyer?
Në fillim po, tani jo më. BE-ja është ndryshe sot nga ajo që ishte kur u themelua. Është e fragmentuar, vuan nga axhendat kombëtare dhe interesat divergjente. Dhe mendoj se është ndikuar shumë nga ekstremet politike që nga kriza e refugjatëve. Populistët e krahut të djathtë mund të mos jenë në pushtet, por ata kanë një ndikim të madh në politikat e qeverive të moderuara. Kjo ndonjëherë bie ndesh me vlerat dhe parimet e BE-së.
Tensionet në rajon po rriten. Serbia së fundi ka zhvendosur automjete të blinduara në kufirin me Kosovën. Por, kjo nuk krahasohet me tensionet e së kaluarës. Rastësisht, kjo është edhe për faktin se kundërshtarët e dikurshëm sot të gjithë duan të anëtarësohen në BE.
Konfliktet ushtarake lindin kur shtetet janë të izoluara dhe jo kur ato janë në një komunitet. Mendoni për zhvillimin pozitiv në marrëdhëniet franko-gjermane ose Irlandën. Rreziku që BE-ja të importojë një konflikt është i ulët. Disa në rajon kanë frikë se doni të bashkoheni me Kosovën për të formuar një Shqipëri të Madhe. Lojëra të tilla të mendjes janë shumë më të mundshme jashtë BE-së, sesa brenda.
