Kryeministri Edi Rama ka dalë në një konferencë të përbashkët me Përfaqësuesin e Lartë të Bashkimit Evropian, Joseph Borell në kuadër të vizitës zyrtare që ky i fundit po zhvillon në Ballkanin Perëndimor.
Në fjalën e tij, kryeministri Rama tha se me Borrell kanë diskutuar për pasojat e Luftës në Ukrainë dhe rritjen e çmimeve, ndërsa kanë folur edhe për integrimin e vendit në BE.
“Kemi diskutuar për luftën në Ukrainë dhe të gjitha pasojat e saj që janë shfaqur në Europë dhe jo vetëm, fillimisht në formën e rritjes së çmimeve, kemi diskutuar patjetër edhe për rolin e Shqipërisë dhe qëndrimin në Këshillin e Sigurimit, në të njëjtën linjë me BE në raport me Rusinë dhe agresionin rus mbi Ukrainën. Por pjesë e diskutimit ka qenë dhe ecuria e mëtejshme e procesit të integrimit të vendit në BE. Konkretisht e procesit për hapjen formale të bisedimeve për anëtarësim, gjë për të cilën besoj zoti Borrell do të flasë vetë. Unë kam përsëritur atë që dihet botërisht se Shqipëria ka zgjedhur këtë pozicion si pozicionin e vetë natyral dhe jo se na e ka kërkuar njeri në Bruksel, në Paris apo Uashington. Ne jemi anëtarë krenarë të një aleance siç është NATO. Jemi Europianë, krenarë për qenien tonë europiane. Shqiptarë që shohim nga Europa derën e të ardhmes tonë, ndaj jemi në këtë pozicion dhe për më tepër ky pozicion na e imponojnë fëmijët tanë”, tha Rama.
Përfaqësuesi i Lartë Borrell do të takohet edhe me përfaqësues të tjerë të autoriteteve shqiptare dhe me përfaqësues të shoqërisë civile dhe do të shohë punimet restauruese që vijojnë tek mozaiku i Muzeut Historik Kombëtar, rinovuar në kuadrin e ndihmës së BE-së për rimëkëmbjen pas tërmetit.
Discussion about this post