Kryeministri Edi Rama me anë të një deklarate lëshuar mbrëmjen e sotme ka konfirmuar dukshëm përçarjen mes tij dhe Shteteve të Bashkuara të Amerikës. Ai iu përgjigj ambasadores Yuri Kim, e cila tha se Rama duhet të bënte një zgjedhje, që Shqipërinë ta drejtonin qytetarët apo kriminelët.
Ndërkohë kreu i qeverisë iu përgjigj kësaj thirrje me një indiferencë, duke thënë se e refuzon këtë gjuhë, pasi e ka bërë tashmë zgjedhjen e tij, që kur ka dalë kundër regjimit komunist.
Sipas Ramës, të akuzohesh nuk ndihmon fare qytetarët, dhe as luftën kundër pastrimit të parave.
“Udhëheqësit duhet të zgjedhin kush do e qeverisë këtë vend, qytetarët apo kriminelët. E kam bërë zgjedhjen kur kam dalë kundër regjimit komunist. Nuk kam asnjë dilemë për këtë. Të akuzosh nuk ndihmon fare qytetarët, nuk e ndihmon luftën kundër krimit e pastrimit të parave. Krijon mjegull në të cilën të vetmit përfitues janë kriminelë”, deklaroi kryeministri.
Por e gjithë kjo situatë nuk mund të kalojë me kaq, pasi mesazhi i Ramës ka gjasa të sjellë një përmbysje në marrëdhëniet me SHBA. Kjo pasi kujtojmë se me qëndrimet e mëparshme, kryeministri dukej i bindur ndaj aleatëve të tij historikë. Megjithatë përçarja duket se ka nisur më herët dhe ai i druhej diçkaje të tillë, qëkur i kërkoi dorëheqjen Gledis Nanos, me qëllim që mos ta shkarkonte, pasi ishte i preferuari i SHBA. Duke qenë se Nano nuk pranoi ofertën e Ramës, duke i bërë ballë, atëherë kryeministri e shkarkoi, duke thyer kështu besimin amerikan.
Kjo u vu re me deklaratën e ambasadës së SHBA, e cila e mbështeti Gledis Nanon, pavarësisht se motivi i shkarkimit nga qeveria shqiptare ishte mospërmbushje e obkektivave.
Nga ana tjetër, kryediplomatja amerikane në vendin tonë Yuri Kim nuk qëndroi indiferente, duke sulmuar Ramën edhe për amnistinë fiskale. Ky i fundit madje së fundmi ka shkuar në SHBA për të lobuar nëpërmjet fondacionit të “George Soros”.
Prej kohësh vihej re një përçarje e mundshme mes Ramës dhe Kim, e cila përfaqëson dukshëm qëndrimin e Shteteve të Bashkuara të Amerikës për çdo çështje që prek Shqipërinë, ku përfshihet dhe kryeministri.
Opinioni publik natyrisht mbetet i habitur nga kjo tronditje, pasi zakonisht Rama nuk ka mbetur takim pa e shprehur hapur simpatinë e tij për Shtetet e Bashkuara të Amerikës, pavarësisht së shkuarës komuniste që mban familja e tij.
Por mund të themi që historia përsëritet në politikën shqiptare. Në rast se kthehemi pas në kohë, e njëjta gjë ka ndodhur edhe me ish-kryeministrin Sali Berisha dhe ish-ambasadorin e SHBA në vendin tonë Alexander Arvizu. Mes tyre pati një përplasje përpara se Arvizu të mbaronte mandatin 4-vjeçar në Shqipëri.
Edhe pse duket se mes liderëve udhëheqësve të vendit tonë dhe kryediplomatëve të huaj është e konsoliduar, situata ndërlikohet herë pas herë për interesa të cilat shpeshherë shkojnë edhe përtej politikës.
Discussion about this post