Në mbledhjen e parë të qeverisë, kryeministri Edi Rama, ndër të tjera, vuri theksin edhe tek marrëdhënia me Parlamentin, ku kërkoi respektimin e marrjes pjesë në komisione apo seancat plenare.
“Pandemia na ka mësuar gjëra me vlerë të madhe. Mund të na duhet të rikthehemi te kombinimi i punës në zyrë me atë në distancë. Duhet të shkojmë përtej pandemisë me këtë që na ka sjellë dhuratë koha. Etika për marrëdhëniet me Parlamentin ka nevojë për plotësime. Ju lutem të gjithëve prania juaj në Komisionet Parlamentare nuk duhet të vihet në diskutim përveç në raste ekstreme të lajmëruara më parë. Ky është minimumi etik. Kjo qeveri duhet të ndërtojë një marrëdhënie të tërë komunikimi. Një tjetër shkelje etike e mandatit të shkuar ka qenë dalja e ministrave me letra individuale drejtuar Komisionit të Kuvendit. Është absurde që ministri të mos mbrojë me argumenta një vendimmarrje të qeverisë”.
Ndër të tjera, kryeministri u ndal edhe tek raportet me opozitën, ku kërkoi edhe njëherë të mos ketë kundërpërgjigje.
“Ka vetëm një sektor për të cilin punon e gjithë qeveria dhe është Shqipëria. Ne nuk do i kundërpërgjigjemi me formatin e vjetër fletë-rrufeve të konferencave të shtypit të opozitës. Nuk duhet të çojmë dëm asnjë ditë duke u marrë me e lagu se lagu me opozitën,” deklaroi Rama.
Më herët, Rama i njohu ministrat me Kodin Etik që duhet të respektojnë, përfshirë ndalimin e udhëtimeve të luksit, dhuratat, apo përdorimi i makinës së punës.
