Një orë vonese ka mbërritur në Parlament kryeministri Edi Rama. Më herët ka pasur debate mes opozitës që kërkonte prezencën e kryeministrit dhe mazhorancës, e cila kërkonte vazhdimin e punimeve të seancës. Fillimisht seanca nisi në orën 16:00, por është ndërprerë disa herë.
Grupi parlamentar i PD-së theksoi se Edi Rama e ka detyrim kushtetues të dëgjojë opozitën për një çështje të rëndësishme siç është programi i ri qeverisës. Ndërkaq, kryetarja e Parlamentit Lindita Nikolla dhe kreu i grupit parlamentar të PS Taulant Balla, thanë se ligji nuk e kushtëzon kryeministrin të jetë i pranishëm në seancë. Lindita Nikolla njoftoi se Rama do të mbërrijë në orën 17:00, por ai u pa në ambientet e Kuvendit ne orën 18:00.
Sapo ka mbërritur në parlament, Rama ka marrë fjalën në foltore dhe është kapur me opozitën. Ai ka thënë se në asnjë rregullore nuk është shkruar që kryeministri duhet të jetë me detyrim në sallë. Më tej ai tha se bllokimi me forcë i foltores, me përdorimin e trupit si pengesë me PS nuk kanë fituar ndonjëherë dhe as nuk do të fitojnë.
“Në këtë rregullore nuk shkruhet në asnjë rresht që ka detyrimin të qëndrojë në sallë kur nuk mund të jetë. Së dyti, dëgjon e gjithë qeveria këtu dhe sigurisht që një debat i zgjatur aq shumë orë nuk mund të jetë i ndjekur nga të gjithë, por gjithçka që thuhet këtu dhe ka interes për ne analizohet më pas. Unë nuk erdha në orën 16:00, për asnjë arsye tjetër por prej ngarkesën e punës, sepse pasnesër do të largohem për shumë ditë. Megjithatë kur mora mesazhin nga kryetarja që ju kishit ngritur çështjen gjatë fjalës së kryetarit të PD, thashë që do të isha në orën 17:00. Unë do të isha këtu dhe kryetari do të merrte fjalën. Por ju bllokuar foltoren. Me të keq, me akte që vënë para forcën fizike përdorimin e trupit si pengesë me ne as nuk keni fituar ndonjëherë dhe as nuk do të fitoni” – tha Rama.
Më tej Rama ka replikuar me kreun e grupit parlamentar të PD, Alfred Rushaj dhe me deputetin Ervin Salianji ku nuk kanë nunguar ironitë.
