Partia Socialiste do të mbledhë pasditen e së hënës Asamblenë Kombëtare, ku pritet të shihet nëse Kryeministri Edi Rama do të njoftojë apo jo ndryshimet në kabinetin qeveritar.
Megjithëse prej javësh paralajmërohen ndryshimet në Qeveri, ende nuk dihet nëse Rama do e ndërmarrë këtë hap, ndërkohë që në një proces reformimi ka përfshirë sekretariatin e PS-së.
Në mbledhjen e fundit të Asamblesë, Rama njoftoi “shkrirjen” e Sekretariatit, duke përfshirë këtu edhe largimin e Damian Gjiknurit, i cili mbante pozicionin e Sekretarit të Përgjithshëm, ndërsa Bledi Çuçin e vendosi në pozicionin e kreut të Grupit Parlamentar.
Në këto kushte pritet që në mbledhjen e 4 shtatorit, Asamblea e PS-së duhet të zgjedhë Sekretarët, ndërsa nuk dihet nëse për 8 pozicionet që kanë mbetur vakante prej 26 korrikut, do të garojnë ose jo ata që ishin në këto funksione dhe që u larguan në mënyrë të beftë nga Kryeministri, njëherazi edhe Kryetar i PS-së.
Nuk përjashtohet mundësia që Blendi Klosi, i cili ka mbajtur pozicionin e Sekretarit Organizativ të PS-së, të kalojë në postin e Sekretarit të Përgjithshëm, duke zëvendësuar në këtë mënyrë Gjiknurin e larguar në fund të muajit korrik.
E përsa i takon pozicioneve në strukturën drejtuese të PS-së do të shihet nëse “përplasja e heshtur” mes grupimit që mbështet Belinda Ballukun, zv.Kryeministren e Ramës, do të arrijë të dominojë ndaj grupimit të Kryebashkiakut Erion Veliaj.
Në mbledhjen e fundit të Asamblesë, atje ku u vendos që Bledi Çuçi të merrte drejtimin e Grupit Parlamentar, u raportua si kandidat potencial për të marrë drejtimin e grupit, Toni Gogu, një prej emrave që rreshtohet në krah të Veliajt, në ndarjen e PS-së. Por duket se Rama nuk kishte mbyllur “llogaritë” politike me Bledi Çuçin, një prej të besuarve të tij, i cili deri pak javë më parë drejtonte Ministrinë e Brendshme, pozicion që ia besoi Taulant Ballës.
E pavarësisht këtyre zhvillimeve të pritshme në kupolën drejtuese të PS-së, e gjithë vëmendja është te ndryshimet në Qeveri.
Nëse Kryeministri do të artikulojë ndryshimet, janë disa emra që pritet të lëshojnë pozicionet e tyre ministrore. Mediat kanë paralajmëruar një ndryshim pothuajse rrënjësor që nis me ministren e Jashtme, për të vijuar me atë të Bujqësisë, Financave, Mbrojtjes, Drejtësisë, të Kulturës apo edhe Shëndetësisë.
Nuk dihet nëse Rama do të jetë i gatshëm që të ndërmarrë lëvizjet në cabinet në mënyrë të njëhershme apo do t’I ndajë ato me një diferencë kohore. Nëse i referohemi mbledhjes që do të mbahet në Këshillin e Sigurimit në mesin e shtatorit, ku Shqipëria pritet të marrë kryesimin, duket pak e vështirë që 10 ditë para këtij takimi, Rama të largojë Olta Xhaçkën nga posti i ministres së Jashtme. Kjo e fundit do të drejtojë mbledhjen e parë të ministrave të Jashtëm në Këshillin e Sigurimit, për të pasuar më pas nga mbledhja e liderëve botërorë në këtë Këshill, që do të drejtohet nga Edi Rama. Gjithsesi nuk përjashtohet mundësia që Rama të marrë vetë drejtimin e Ministrisë së Jashtme, ashtu sikundër ndodhi kohë më parë, kur Presidenti i asaj kohe Ilir Meta, nuk dekretonte Gent Cakajn si ministër.
Discussion about this post