Pas kritikave të shumta, kryeministri Edi Rama ka mbrojtur sërish projektin e Portit të Durrësit. Ai shprehet për të disatën herë, se kjo është kontrata më e mirë që ka siguruar ndonjëherë Shqipëria. Kjo gjë sipas Ramës nuk ka ndodhur kurrë më parë, që shteti të bëhet ortak 33% në një investim të huaj.
Pas sulmeve që bën ndër rreshta për opozitën dhe mediat, duket se Rama do e vazhdojë debatin, kësaj here edhe vetë. Ai shtoi se do të marrë pjesë vetë në seancën e radhës në Kuvend. Për të treguar të vërtetën e tij.
“Çfarë s’po na dëgjojnë veshët për një prej kompanive më prestigjoze të Lindjes së Mesme dhe një prej investitorëve më të vlerësuar në industrinë globale të turizmit, që është fat, nder dhe mundësi e paçmuar t’i angazhojmë si partnerë të shtetit në Durrës!
Në një harmoni fatale të injorancës me ligësinë, motivuar prej urrejtjes politike si mishërim i mallkimit që e përndjek këtë vend në rrugën e shtetbërjes qysh prej 1912.
Ka plasur e dalë rrugëve një llum i pashoq akuzash mbi gjysëm të vërteta. Që janë edhe gënjeshtrat më të mëdha!
Investimi më i madh i huaj në rajon,që do të transformojë Durrësin e Shqipërinë. Dhe do impaktojë drejtëpërdrejtë ekonominë kombëtare, trajtohet si aferë katundi për pula. Ndërsa kontrata më gjatë e negociuar e shtetit shqiptar me një palë tjetër, lexohet si defter hallvaxhinjsh!
Mirë vetes i thua duro si ke duruar se të dinë si veten e s’ke ç’u bën. Po sekëlldi e madhe t’u shpjegosh të huajve se si mund të kulmojnë kaq lart injoranca me ligësinë. Dhe si mund të akuzohen investitorë të kalibrit të Muhammed Alabbarit për pazarllëqe të nivelit të Gërdecit!
Shteti shqiptar ortak me 33% në një investim të huaj s’ka qenë kurrë dhe për këtë kemi negociuar kaq gjatë. E s’i ramë shkurt me ligjin e Shqipërisë 1 €uro, siç do kishin bërë përbaltësit tanë. Pasi t’i kishin kërkuar 33% për vete apo siç e kishin zakon të thoshin “gjys për gjys”!
Po mezi po e pres seancën e parlamentit javën tjetër. Ku të gjitha faktet do t’i ndajmë mirë e mirë me shqiptarët. Se me të shiturit për rubla e me urrejtësit profesionistë të banaqeve mediatike, s’ka të bardhë që nuk kthehet në të zezë. Dhe s’ka diell që nuk mbulohet me shoshë!,”-tha Edi Rama.
Discussion about this post