Kryeministri Rama zhvilloi një takim në Ministrinë e Brendshme ku i cilësoi si të papranueshme akuzat dhe baltën që sipas tij po hidhen mbi Policinë e Shtetit nga opozita. Rama pranoi se brenda radhëve të policisë ka individë të lidhur me krimin dhe të korruptuar. Ndërsa ministri i Brendshëm, Fatmir Xhafaj, përfitoi nga natyra mediatike e takimit, për të lëshuar një mesazh që ngjante më shumë politik.
Rikthimin në publik Edi Rama zgjodhi ta bënte përpara uniformave blu, në një takim në Ministrinë e Brendshme. Kryeministri drejtoi gishin e akuzës nga rivalët politikë, të cilët i fajësoi se po favorizojnë krimin duke baltosur policinë.
Iu rikthye edhe njëherë Lazaratit duke cituar një raport të autoriteteve italiane, sipas të cilave në vitin 2013 në atë territor, ishin prodhuar 900 ton kanabis.
Foli për rimëkëmbjen e policisë, pa harruar krahasimin me kohën kur qeverisnin demokratët.
Kryeministri ishte i vetëdijshëm se nga rotacioni i pushtetit te ngjarjet e pak ditëve më parë në Elbasan, kanë kaluar më shumë se 4 vjet. I quajti të turpshme pamjet që tregonin dorëzimin e policisë, por fajin e gjeti te të tjerët.
Iu rikthye krahasimeve kur erdhi fjala te lufta ndaj grupeve kriminale.
Pranoi se krimi ka depërtuar brenda policisë, por ilaçi tha se do të jetë vettingu i uniformave blu.
Në takim ishte prezent edhe ministri i Brendshëm, Fatmir Xhafaj, i cili mes të tjerash, u kujdes të dërgonte edhe një mesazh, që duket se kishte për destinacion zhvillimet brenda PS-së.
https://www.youtube.com/watch?v=k6w2IGP6tfs
