Kryeministri Edi Rama ka dalë në një deklaratë të jashtëzakonshme, ku ka folur në lidhje me krizën e re që i kanoset vendit, ajo e energjisë elektrike. Rama e ka quajtur krizën energjitike të ngjashme dhe po aq goditëse sa pandemia dhe tërmeti, krizë e cila ka filluar të japë shenjat dhe në tregjet më të mëdha të botës.
“Vala goditëse e një tjetër fatkeqësie natyrore, kësaj radhe e kombinuar me faktorë gjeopolitikë dhe manovra tregtare, po vjen drejt Shqipërisë. Nuk është as tërmet, as virus, as përmbytje dhe lavdi Zotit, nuk kërcënon jetë njerëzish. Por në aspektin ekonomik e social ka një energji negative që mund të ketë efekte gjithaq tronditëse, mbi jetën e familjeve, bizneseve, shoqërisë. Kjo, është kriza e jashtëzakonshme energjitike, e cila vetëm sapo ka nisur, të japë shenjat e saj tejet shqetësuese në tregjet e mëdha të botës, duke nisur nga Kina e Koreja e Jugut, në Amerikë, në Britaninë e Madhe dhe në hapësirën e Bashkimit Europian, e deri në vendet fqinje, si Italia e Greqia”.
Në momentin që shpresat për rikthimin në normalitet po rriteshin, rritja e kërkesës konsumatorë ka rritur eksponencialisht edhe kërkesën e industrive prodhuese për energji, duke vënë në vështirësi edhe shtetet më të fuqishme.
“Tamam kur shpresat për rikthimin në normalitet, pas tragjedisë së shkaktuar nga pandemia, të cilës njerëzimi po i paguan koston e humbjeve njerëzore të një lufte botërore, janë rritur ndjeshëm, falë vaksinimit masiv dhe ritmeve të larta të rimëkëmbjes ekonomike, kjo krizë e re, na vendos me detyrim përcaktim përpara një sprove të re, po aq të fortë sa tërmeti e sa pandemia, në aspektin ekonomik e social. Rritja eksponenciale e kërkesës konsumatore, pas hapjes së ekonomisë si rezultat i vënies nën kontroll të pandemisë, ka rritur eksponencialisht edhe kërkesën e industrive prodhuese për energji, duke vënë në vështirësira shumë serioze edhe vetë kolosët ekonomikë të planetit”.
Si rrjedhojë qeveria shqiptare nuk ka lejuar që ta shpërdorojë si mundësi duke justifikuar kështu rritjen e frikshme të çmimit të naftës apo gazit.
Çmimi i gazit në tregun tonë është rritur me 30-40 lekë gjatë këtij viti. Nëse gazi deri në fillim të këtij viti ishte deri në 50-60 lekë për litër, sot arrin në 90 lekë. Sakaq, bëhet me dije se në ritme rritëse vazhdojnë nafta edhe benzina. Në 15 korrik në disa pika karburanti 1 litër naftë iu shit shoferëve me 170-175 lekë, nga 155-160 lekë që ishte në vitin e kaluar. Ndërsa tani nafta në shumicën e karburanteve është 177 lekë, kurse benzina arrin deri 180 lekë.
Ekspertët shprehen se, shkak për këtë rritje është bërë rritja e çmimit të naftës në tregjet ndërkombëtare. Po ashtu rritja e kërkesës për konsum pas hapjes së ekonomisë ka rritur edhe çmimin për shkak të ofertës së ulët në treg. Për Shqipërinë, çmimi mesatar vjetor i blerjes së energjisë nga importi, është thuajse trefishuar në krahasimin me vitin e kaluar.
Në mungesë të ndërmarrjes së veprimeve të shpejta dhe profesionale nga institucionet shtetërore, biznesi, qytetarët dhe ekonomia kombëtare do të përballet me kosto shtesë nga rritja e çmimeve të importuara nga tregjet ndërkombëtare.
Më herët, Konfindustria reagoi lidhur me rritjen e çmimit të karburanteve në Shqipëri. Në një deklaratë zyrtare ata kërkuan që politika përfshirë dhe opozitën të marrin masa sa më shpejt, pasi kjo mund të marrë përmasat e një krize të vërtetë energjitike në vitet 2021-2022.
