Kryeministri Edi Rama do të nisë ditën e sotme një vizitë në Kosovë, ku do të marrë pjesë në ceremonitë e organizuara për të shënuar 25 vjetorin e Çlirimit të vendit.
Kreu i qeverisë do të takohet me drejtuesit kryesorë politikë në Kosovë, ku spikat ai me presidenten e vendit, Vjosa Osmani, teksa nuk ka në agjendë një takim me homologun Kurti.
Më pas, Kryeministri Rama do të marrë pjesë në Konferencën Ndërkombëtare “Rugova dhe Perëndimi”, dedikuar këtij përvjetori, që mbahet në nderim të trashëgimisë politike të Presidentit Rugova, si dhe të vendeve aleate, të cilat patën një rol thelbësor gjatë viteve të luftës në Kosovë.
Në vijim të agjendës, Kryeministri Rama do të mikpritet nga Kryetari i Komunës së Prishtinës Përparim Rama, ku në një ceremoni të posaçme do të nderohet me Çelësin e Qytetit.
Ndër të tjera, Rama do të marrë pjesë edhe në çeljen e ekspozitës së veçantë “Reporting House”, një retrospektivë e fuqishme e mediave gjatë periudhës së luftës në Kosovë, ku përmes artefakteve të gazetarëve dhe veprave të artistëve, vizitorët do të njihen me historinë e luftës së viteve 1998-1999 dhe ndikimin e saj në dekadat që pasuan.
Discussion about this post